आकाश दीप, अर्शदीपला दुखापत; धोनीच्या आवडत्या खेळाडूची टीम इंडियात निवड, एका डावात घेतल्यात 10 विकेट्स

हिंदुस्थान आणि इंग्लंड संघात पाच कसोटी सामन्यांची मालिका सुरू आहे. मालिकेतील पहिला आणि तिसरा सामना जिंकत इंग्लंडने 2-1 अशी आघाडी घेतली आहे. चौथा सामना 23 जुलैपासून मॅन्चेस्टरच्या ओल्ड ट्रॅफर्ड मैदानावर सुरू होईल. हा सामना जिंकून मालिकेत बरोबरी साधण्याचा प्रयत्न हिंदुस्थानचा असणार आहे. मात्र या लढतीपूर्वी हिंदुस्थानला मोठा धक्का बसला असून वेगवान गोलंदाज अर्शदीप सिंग आणि आकाश दीप यांना दुखापत झाली आहे. त्यामुळे त्याच्या जागी वेगवान गोलंदाज अंशुल कंबोज याचा संघात स्थान देण्यात आल्याचे वृत्त ‘इंडियन एक्सप्रेस’ने दिले आहे.

मॅनचेस्टर कसोटीसाठी हिंदुस्थानचा संघ कसून सराव करत आहे. या लढतीत अर्शदीप सिंग याला संघात स्थान मिळण्याची शक्यता होती. मात्र 17 जुलैला सराव करताना त्याच्या हाताला दुखापत झाली. त्यामुळे तो चौथ्या कसोटीत खेळू शकणार नाही. तसेच आकाश दीप यालाही दुखापत झाल्याचे वृत्त आहे. त्यामुळे हिंदुस्थानने पर्यायी खेळाडू म्हणून 24 वर्षीय अंशुल कंबोज याची निवड केली आहे.