नगरपालिका व नगरपरिषदेच्या निवडणुकीदरम्यान महायुतीत भाजप आणि शिंदे गटात महाभारत सुरू असून ढकलाढकलीपर्यंत वाद गेला आहे. वनमंत्री गणेश नाईक यांनी गाडीत अडचण झाली तर अॅडजस्ट करू, जर तुम्ही आम्हाला ढकलाल तर कोण कुणाला बाहेर ढकलते ते पाहूच, असे म्हणत शिंदे गटाला सूचक इशारा दिला आहे.
भाजप आणि शिंदे गटात गेल्या 15 दिवसांपासून मोठी धुसफुस सुरू आहे. दोन्ही पक्षांत एकमेकांचे उमेदवार पह्डण्यावरून सुरू असलेले वाद विकोपाला गेले आहेत. भाजप प्रदेश अध्यक्ष रवींद्र चव्हाण यांनी युती टिकण्यासंदर्भात केलेल्या विधानामुळे महायुतीतील बेबनाव उघड झाला आहे.
‘रवींद्र चव्हाण बोलण्याच्या ओघात चुकून बोलले असतील. त्याला गांभीर्याने घेण्याची गरज नाही. आम्हाला विकास करायचा आहे. अडचण झाली तर अॅडजेस्ट करू. पण उद्या आम्हालाच ढकलणार असाल तर आम्हीही पुढे कोण कुणाला बाहेर ढकलते ते पाहूच’, असे गणेश नाईक म्हणाले. या विधानामुळे महायुतीत आलबेल नसल्याचे स्पष्ट झाले आहे.
2 डिसेंबरपर्यंत भांडणे करू नका, असे चव्हाण यांना म्हणायचे असेल, अशी सारवासारव मंत्री गिरीश महाजन यांनी केली. तर ही युती कायम राहील, असे एकनाथ शिंदे म्हणाले.
काय म्हणाले होते रवींद्र चव्हाण?
मला 2 डिसेंबरपर्यंत युती टिकवायची आहे. त्यानंतर मी नीलेश राणेंना उत्तर देईन. आता मी काहीही बोलणार नाही, अशी प्रतिक्रिया भाजप प्रदेश अध्यक्ष रवींद्र चव्हाण यांनी शिंदे गटाचे आमदार नीलेश राणे यांनी केलेल्या आरोपांवर दिली होती.
युती टिकवायची की नाही हे शिंदे यांच्या मतावर – गुलाबराव
युती टिकवायची की नाही हे एकनाथ शिंदे यांच्या मतावर आहे. आता कोणी काही म्हटलं म्हणून युती तुटत नसते आणि कोणी काही म्हटलं म्हणजे युती होते असं होत नाही. देवेंद्र फडणवीस आणि एकनाथ शिंदे आहेत, हा त्यांचा विषय आहे, असे शिंदे गटाचे मंत्री गुलाबराव पाटील यांनी म्हटलं आहे.
Comments are closed.