मेस्सीचा हिंदुस्थानचा चौफेर दौरा; पूर्व-पश्चिम-उत्तर-दक्षिण…लिओनल मेस्सी संपूर्ण हिंदुस्थान फिरणार

अर्जेंटिनाचा विश्वविजेता कर्णधार आणि फुटबॉल जगतातील महान खेळाडू लिओनल मेस्सी हिंदुस्थानचा चौफेर दौरा करणार आहे. त्याने आपल्या बहुप्रतीक्षित ‘गोट टूर टू हिंदुस्थान 2025’मध्ये हैदराबादलाही समाविष्ट केल्याची अधिकृत घोषणा आज केली आहे. पुढील महिन्यात होणाऱया या दौऱयात कोलकाता, हैदराबाद, मुंबई आणि नवी दिल्ली अशी चार प्रमुख शहरं मेस्सीच्या पावलांनी गजबजणार आहेत.

मेस्सी 13 डिसेंबर रोजी कोलकात्यातून आपल्या दौऱयाला सुरुवात करेल. त्याच दिवशी सायंकाळी तो हैदराबादला पोहोचेल. 14 डिसेंबरला मुंबई आणि 15 डिसेंबरला नवी दिल्ली येथे दौरा संपन्न होईल. दिल्ली मुक्कामी पंतप्रधान नरेंद्र मोदी यांची भेट घेण्याचीही शक्यता व्यक्त करण्यात आली आहे.

केरळचे क्रीडामंत्री व्ही. अब्दुरहीमान यांनी 17 नोव्हेंबरला कोची येथे अर्जेंटिनाचा मैत्रीपूर्ण सामना होणार असल्याची घोषणा केली होती. मात्र तो रद्द झाल्यानंतर दौऱयाच्या सुधारित आराखडयात हैदराबादचा समावेश करण्यात आल्याचे आयोजकांनी स्पष्ट केले.

‘गोट टूर टू हिंदुस्थान 2025’चे एकमेव आयोजक सताद्रू दत्ता यांनी वृत्तसंस्थेला सांगितले की, ‘हैदराबादमधील कार्यक्रम गचीबावली किंवा राजीव गांधी आंतरराष्ट्रीय स्टेडियमवर होण्याची शक्यता आहे. येथील कार्यक्रमात सेलिब्रिटी मॅच, फुटबॉल क्लिनिक, गौरव समारंभ आणि संगीत मैफल यांचा समावेश असेल.’

दत्तांच्या संकल्पनेतून साकारलेल्या या दौऱयात चारही शहरांत सेलिब्रिटी फुटबॉल सामने, संगीत कार्यक्रम, भेटीगाठी, मुलांसाठी मास्टरक्लासेस आणि सन्मान समारंभ असे कार्यक्रम आयोजित करण्यात येणार आहेत. पूर्व (कोलकाता), दक्षिण (हैदराबाद), पश्चिम (मुंबई) आणि उत्तर (नवी दिल्ली) अशा हिंदुस्थानातील ‘चारही दिशां’ना स्पर्श करणारा हा दौरा फुटबॉल चाहत्यांसाठी पर्वणी ठरणार आहे.

लवकरच भेटू!

‘हिंदुस्थानकडून होणाऱया प्रेमासाठी धन्यवाद. काही आठवडय़ांत ‘गोट टूर’ सुरू होतोय. कोलकाता, मुंबई आणि दिल्लीसोबतच आता हैदराबादचाही समावेश करण्यात आला आहे. लवकरच भेटू!’ अशी पोस्ट मेस्सीने आपल्या सोशल मीडिया हॅण्डलवरून केली.