महाराष्ट्र राज्य कबड्डी संघटनेचे सरकार्यवाह बाबुराव चांदेरे यांनी आपल्या मनमानी कारभाराची परिसीमा गाठत कबड्डीच्या घटनेचा अक्षरशः चोळामोळा केला आहे. अहिल्यानगर जिल्हा संघातून तांत्रिक कारणावरून वगळलेल्या चार कुमार खेळाडूंना ५२ व्या कुमार राज्य अजिंक्यपद निवड चाचणी स्पर्धेत थेट नंदूरबार जिल्ह्यातून उतरविण्याचा धक्कादायक प्रकार उघडकीस आला आहे. यामुळे राज्यातील कबड्डी वर्तुळात खळबळ माजली आहे.
राज्य कबड्डी संघटनेचे उपाध्यक्ष शशिकांत गाडे यांनी या संपूर्ण प्रकरणाची तातडीने चौकशी करून बाबुराव चांदेरे आणि तांत्रिक समितीचे प्रमुख मालोजी भोसले यांच्यावर दंडात्मक कारवाई करण्याची मागणी कार्याध्यक्ष गजानन कीर्तीकर यांच्याकडे केली आहे.
पदाचा गैरवापर, घटनेची पायमल्ली
अहिल्यानगर जिल्हा कुमार संघातून ओम गायकवाड, नितेश आढे, आकाश पारधे आणि अयाज शेख या चार खेळाडूंना तांत्रिक कारणास्तव वगळण्यात आले होते. मात्र बाबुराव चांदेरे यांनी आपल्या पदाचा गैरवापर करत तांत्रिक समितीच्या मालोजी भोसले यांच्या मदतीने या चारही खेळाडूंचे परस्पर नंदूरबार जिल्ह्यात स्थानांतरण केले आणि राज्य निवड चाचणी स्पर्धेत उतरवले. विशेष म्हणजे, हे स्थानांतरण करताना खेळाडूंच्या मूळ जिल्ह्याची, क्लबची आणि संबंधित संस्थांची कोणतीही परवानगी घेतलेली नाही, तसेच आवश्यक असलेले एनओसी प्रमाणपत्रही जोडलेले नाही, अशी गंभीर बाब समोर आली आहे.
नियम पायदळी; संघटनेच्या तोंडाला काळे?
राज्य कबड्डी संघटनेच्या नियमानुसार खेळाडूंचे जिल्हा बदल केवळ ऑगस्ट व सप्टेंबर महिन्यांत करता येतात. शिवाय स्थानांतरणासाठी सर्व परवानग्या व लेखी प्रमाणपत्रे बंधनकारक आहेत. मात्र या नियमांना हरताळ फासून चांदेरे यांनी वगळलेल्या खेळाडूंना स्पर्धेत खेळविण्याचा अत्यंत गंभीर प्रकार केल्याचे स्पष्ट झाले आहे.
आक्षेप नोंदवल्यावर ‘समझोत्याचा’ दबाव
ही नियमबाह्य बाब उघडकीस येताच छत्रपती संभाजीनगर संघाने नंदूरबार संघाविरुद्ध आक्षेप नोंदवून चार बदली खेळाडूंना अपात्र ठरवण्याची मागणी केली. मात्र त्यावेळी बाबुराव चांदेरे यांनी संबंधित संघाला ‘समझोता करा’ असा सल्ला देत दबाव टाकल्याचा आरोप झाला आहे. उभय संघातील सामन्यात छत्रपती संभाजीनगर पराभवाच्या छायेत होता, मात्र या बदली खेळाडूंबाबत आक्षेप घेतात नंदूरबार संघाने स्पर्धेतून माघार घेतली आणि छत्रपती संभाजीनगरला पुढे चाल देण्यात आली. या घटनेनंतर छत्रपती संभाजीनगरसह अहिल्यानगर कबड्डी संघटनेनेही चांदेरे आणि भोसले यांना तात्काळ निलंबित करून संपूर्ण प्रकरणाची चौकशी तटस्थ समितीमार्फत करावी, अशी मागणीही केली आहे.
दोषी आढळल्यास कठोर कारवाई
या प्रकरणावर प्रतिक्रिया देताना राज्य संघटनेचे कार्याध्यक्ष गजानन कीर्तीकर म्हणाले, संघटना कोणाचीही असो, पण घटना सर्वोच्च आहे. तिचे काटेकोर पालन झालेच पाहिजे. खेळाडू स्थानांतरणात काही गैरप्रकार किंवा नियमबाह्य प्रकार झाले असल्यास दोषी पदाधिकार्‍यांवर कठोर कारवाई केली जाईल. सर्व कागदपत्रांची तपासणी करण्यासाठी स्वतंत्र चौकशी समिती स्थापन केली जाईल.
राज्य कबड्डीला लागलेली कीड कधी संपणार?
एकीकडे महाराष्ट्राचा कबड्डी संघ अपयशाच्या गर्तेत अडकलेला असताना, दुसरीकडे सत्तेची नशा, पक्षपात आणि लांगूलचालनामुळे खेळाच्या मुळावरच घाव घातला जात असल्याची भावना राज्यातील अनेक संघटना उघडपणे व्यक्त करत आहेत. चांदेरेंची ‘हम करे सो कायदा’ ही प्रवृत्तीच महाराष्ट्राच्या कबड्डीसाठी सर्वांत मोठा शत्रू ठरत असल्याचे हे प्रकरण अधोरेखित करते.
चांदेरेंची लगीनघाई…
याप्रकरणी बाबुराव चांदेरेंना वारंवार संपर्क साधण्याचा प्रयत्न केला. पण त्यांनी या प्रकरणी काहीही ऐकून न घेता, मी लग्नात आहे. मी कार्यक्रमात आहे. मी बैठकीत आहे. असेच मेसेज दिले. यावरुन चांदेरेंसाठी हे प्रकरण नेहमीचेच असल्याचे कळते. त्यांच्यासाठी लग्न महत्त्वाचे असून खेळाडू बदलीप्रकरणी कोणतीही प्रतिक्रिया देण्याची घाई नसल्याचे स्पष्टपणे दिसून आलेय.
Comments are closed.