2027 मध्ये उत्तराखंडमध्ये अर्धा कुंभमेळा

14 जानेवारीपासून प्रारंभ : 10 मुख्य स्नानांच्या तारखा निश्चित : हरिद्वार गजबजणार : आखाडा प्रतिनिधींसमवेत मुख्यमंत्र्यांची बैठक

वृत्तसंस्था/ हरिद्वार

उत्तराखंडमधील 2027 च्या अर्ध कुंभमेळ्याच्या तारखा निश्चित झाल्या आहेत. हरिद्वारमधील हा भव्य कार्यक्रम 14 जानेवारी 2027 पासून सुरू होऊन 20 एप्रिल रोजी संपेल. 97 दिवस चालणाऱ्या या कार्यक्रमात 10 प्रमुख स्नानांचा समावेश आहे. पहिले शाहीस्नान 14 जानेवारीला होणार असले तरी 1 जानेवारीपासूनच कुंभमेळ्याशी संबंधित विविध धार्मिक कार्यक्रमांना सुरुवात होणार असल्याची माहिती मुख्यमंत्र्यांनी दिली.

हरिद्वारमधील 2027 च्या अर्ध कुंभमेळ्याच्या तयारीसाठी मुख्यमंत्री पुष्कर सिंह धामी यांची शुक्रवारी हरिद्वार धरण कोठी येथे आखाड्याच्या प्रतिनिधींसोबत बैठक झाली. मेळा प्रशासनाचे प्रतिनिधित्व करणाऱ्या 13 आखाड्यांपैकी प्रत्येकी दोन प्रतिनिधींनी बैठकीत भाग घेतला. याप्रसंगी मेळाव्यादरम्यान होणाऱ्या स्नान आणि शाही स्नानाच्या तारखांवर चर्चा करण्यात आली. 2027 या वर्षीच्या महाकुंभातील पहिले शाहीस्नान 14 जानेवारी रोजी मकरसंक्रांतीच्या मुहुर्तावर होईल.

त्यानंतर दुसरे अमृतस्नान मौनी अमावस्येला 6 फेब्रुवारी रोजी होणार आहे. तसेच 11 फेब्रुवारी रोजी वसंत पंचमीला, 20 फेब्रुवारी रोजी माघ पौर्णिमाला आणि महाशिवरात्रीचे अमृत स्नान 6 मार्च 2027 रोजी होईल, असे सांगण्यात आले. फाल्गुन महिन्यातील अमावस्येचे अमृतस्नान 8 मार्च 2027 रोजी होईल. मेह संक्रांती अमृत स्नान 14 एप्रिल 2027 रोजी झाल्यानंतर 15 एप्रिल रोजी श्रीराम नवमी आणि 20 एप्रिल 2027 रोजी चैत्र पौर्णिमेनिमित्त स्नान होणार असल्याचेही सांगण्यात आले. बैठकीदरम्यान सर्व 13 आखाड्यांनी स्नानाच्या तारखा आणि व्यवस्थेवर एकमत केले.

97 दिवस चालणाऱ्या या कार्यक्रमात 10 प्रमुख स्नानांचा समावेश आहे. पहिल्यांदाच चार शाही अमृत स्नानांचा समावेश असल्यामुळे हा निर्णय ऐतिहासिक मानला जातो. अर्धकुंभाच्या तारखांबाबत अनेक दिवसांपासून सुरू असलेल्या चर्चांनंतर हा मेळा कुंभमेळ्याप्रमाणेच दिव्य आणि भव्य पद्धतीने आयोजित केला जाईल, अशी घोषणा करण्यात आली. यादरम्यान लाखो भाविक हरिद्वारमध्ये येण्याची अपेक्षा आहे. गर्दी नियंत्रण, गंगा घाटांची क्षमता, वाहतूक व्यवस्थापन, तात्पुरते मार्ग आणि पार्किंग यासारख्या या मुद्यांवर बैठकीत प्रमुखपणे चर्चा झाली.  सरकारने अर्धकुंभाची परंपरा, श्रद्धा आणि प्रतिष्ठा लक्षात घेऊन तयारी सुरू केली आहे.

मेळ्याचा कालावधी : 1 जानेवारी ते 30 एप्रिल

जरी अर्धकुंभ अधिकृतपणे 14 जानेवारी 2027 रोजी सुरू होणार असला तरी मेळ्याचे उपक्रम आणि तयारी 1 जानेवारी ते 30 एप्रिलपर्यंत सुरू राहतील. या काळात सर्व प्रमुख स्नानगृहे, सांस्कृतिक कार्यक्रम आणि आखाड्यांच्या पारंपारिक मिरवणुका होतील.