तेलंगणाहून निघालेले दाम्पत्य बेपत्ता, विहिरीत आढळली कार; ग्रामस्थांची गर्दी, पोलिस घटनास्थळी

बुलढाणा: तेलंगणा राज्यातील सीतापूरम येथून जळगाव खान्देश येथे लग्न सोहळ्यासाठी कारने निघालेलं दाम्पत्य बुलढाणा (Buldhana) जिल्ह्यातील खामगाव ते मलकापूर दरम्यान गायब झाल्याने नातेवाईक व मित्र परिवारामध्ये खळबळ उडाली होती. जिल्ह्याीतल वडनेर भोलजी परिसरात हे दाम्पत्य रहस्यमयरित्या बेपत्ता झाल्यानंतर त्यांच्यासाठी शोधमोहिम सुरू करण्यात आली. याबाबत दाम्पत्याच्या नातेवाईकांनी नांदुरा पोलिसात तक्रार दाखल केल्यानंतर पोलिसांनी शोध घेतला असता येथील एका विहिरीत कार आढळून आली आहे. घटनेची माहिती मिळताच पोलिसांनी (Police) घटनास्थळी धाव घेत कार विहिरातून बाहेर काढण्याचे प्रयत्न सुरू आहेत. दरम्यान, ही कार गायब झालेल्या पाटील दाम्पत्याचीच असल्याचं आता समोर आलं असून दोघांचेही मृतदेह कारमध्ये आढळून आले आहेत.

जळगाव जिल्ह्यातील पद्मसिंह दामू पाटील हे तेलंगणा राज्यातील सीतापुरम येथील एका खाजगी सिमेंट कंपनीमध्ये कार्यरत आहेत. ते व त्यांची पत्नी नम्रता हे त्यांच्या स्वतःच्या कार क्रमांक एम एच 13 बी एन 8583 ने जळगाव खान्देश जिल्ह्यातील पाचोरा येथे लग्न सोहळ्याला जाण्यासाठी निघाले होते. त्यांचं शेवटचं मोबाईल लोकेशन हे बुलढाणा जिल्ह्यातील खामगाव ते मलकापूर दरम्यान महामार्गावर असलेल्या वडनेर गावाजवळ आढळून आलं आहे. मात्र, त्यानंतर हे दाम्पत्य रहस्यमयरित्या बेपत्ता झाल्याची तक्रार दांपत्याच्या नातेवाईकांनी नांदुरा पोलिसात दाखल केली. त्यानुसार, पोलिसांचे पथक या दांपत्यांच्या शोधासाठी रवाना झाले असतानाच परिसरातील एका विहिरीत कार आढळून आली आहे. अचानक बेपत्ता झालेल्या दांपत्याच्या घटनेमागे घातपाताचा संशय ही व्यक्त होत आहे.

वडनेर भोलजी नजीक राष्ट्रीय महामार्ग क्रमांक 6 च्या बाजूला एका विहिरीत पांढर्‍या रंगाची एक कार आढळून आली असून ही कार पाटील दांपत्याची असण्याची शक्यता वर्तवली जात आहे. घटनास्थळी नुकतेच पोलीस पोहोचले असून परिसरातील ग्रामस्थांनीही गर्दी केली आहे. सध्या विहिरीतून कार बाहेर काढण्याचं काम सुरू आहे. परवा गुरुवार सायंकाळी पाटील दांपत्य तेलंगणाहून जळगावकडे जात असताना अचानक हे दाम्पत्य बेपत्ता झाले होते. त्यानंतर, पोलिसांनी गेल्या 24 तासापासून पोलिसांनी युद्ध पातळीवर शोध मोहीम राबवली होती. पोलिसांनी क्रेनच्या सहाय्याने ती कार बाहेर काढली असता आतमध्ये दोघांचेही मृतदेह आढळल्याने सर्वांना धक्का बसला. हा अपघात आहे की घातपात? याची पुढील चौकशी आता पोलीस करत आहेत.

हेही वाचा

भाजपचा एखादा नगरसेवक निवडून आला तर खूप झालं; जळगावात भाजप अन् शिवसेनेत जुंपली, नेते आमने-सामने

आणखी वाचा