IND vs SA: रांची वनडे सामन्यात प्लेइंग इलेव्हनसह फलंदाजी क्रम देखील बदलणार! कर्णधार के एल राहुलचं स्पष्टीकरण

टीम इंडिया आणि दक्षिण अफ्रीका (Team india vs South Africa) यांच्यात रांचीत होणाऱ्या वनडे सामन्यापर्यंत आता 24 तासांपेक्षा कमी वेळ उरला आहे. अशा परिस्थितीत प्लेइंग 11 कशी असेल यावर चर्चा जोर धरू लागली आहे. सामन्यापूर्वी झालेल्या प्रेस कॉन्फरन्समध्ये कर्णधार केएल राहुलला (KL Rahul) याबाबत मोठा प्रश्न विचारला गेला. राहुलने प्लेइंग 11 आणि बॅटिंग ऑर्डरमध्ये बदल याबाबत काही हिंट दिले आहेत. त्यामुळे हे स्पष्ट झाले की, सलग बदल करण्याची परंपरा या वनडे मालिकेतही सुरू राहणार आहे.

शुबमन गिलच्या (Shubman gill) अनुपस्थितीत कर्णधारपदाची जबाबदारी केएल राहुलवर आली आहे. सध्या राहुल क्रमांक 6 वर बॅटिंग करत आहे. या क्रमांकावर त्याने 10 सामन्यांमध्ये 40.50 सरासरीने 243 धावा केल्या आहेत. दक्षिण अफ्रीका विरुद्ध मालिकेबाबत कर्णधार राहुलने सामन्यापूर्वी सांगितले,
अद्याप अंतिम प्लेइंग 11 ठरलेली नाही, पण मी त्याच क्रमाने बॅटिंग करणार आहे. मी चँपियन्स ट्रॉफी नंतरपासून क्रमांक 6 वर खेळत आहे, आणि तिथेच खेळत राहीन. तसेच रवींद्र जडेजा, वॉशिंग्टन सुंदर आणि नीतीश रेड्डीसारखे अष्टपैलू खेळाडू आमच्याकडे आहेत. आमच्याकडे सर्व पर्याय आहेत. आम्ही सर्वोत्तम प्लेइंग 11 ठरवून संध्याकाळी निर्णय घेऊ, आणि तुम्हाला उद्या माहित होईल.

टीम इंडियाच्या प्लेइंग 11 मध्ये बदल निश्चित आहे. कर्णधार शुबमन गिल आणि उपकर्णधार श्रेयस अय्यर दुखापतीमुळे या मालिकेत सहभागी नाहीत. त्यांच्या जागी कोण खेळेल हा मोठा प्रश्न आहे. शुबमन गिलची जागा यशस्वी जयस्वाल किंवा ऋतुराज गायकवाड घेऊ शकतात, तर श्रेयस अय्यरची जागा ऋषभ पंत किंवा तिलक वर्मा घेऊ शकतात. त्यामुळे टीम इंडियाच्या प्लेइंग 11 मध्ये बदल होईल आणि बॅटिंग ऑर्डरमध्येही बदल निश्चित आहे.