तुकाराम मुंढेंचा धडाका सुरूच; पुणे, कोल्हापुरात मेडिकल फर्मवर छापा, 25 लाखांची औषधं जप्त

अन्न आणि औषध प्रशासन बातम्या: बेकायदेशीर औषध व्यवसायावर अन्न व औषध प्रशासन विभागाने मोठी कारवाई केली आहे. कोल्हापूर आणि पुण्यातील कारवाईत तब्बल 24.87 लाख रुपयांचा औषधसाठा जप्त करण्यात आला आहे. कोल्हापूरमधील मेडिकल फर्मवर छापा, 13.76 लाखांचे अॅलोपॅथिक औषध जप्त केले आहे. आवश्यक परवाने व कागदपत्रांअभावी औषधसाठ्यांवर कारवाई करण्यात आली आहे. पुण्यात नामांकित औषध कंपनीच्या गोदामातून 11.11 लाखांची Schedule-H औषधे जप्त करण्यात आली आहेत. प्रिस्क्रिप्शन औषधांच्या जाहिरातीबाबत नियमभंग आढळल्याने कारवाई केली आहे.

जप्त औषधांचे नमुने तपासणीसाठी प्रयोगशाळेत पाठवण्यात आले

जप्त औषधांचे नमुने तपासणीसाठी प्रयोगशाळेत पाठवण्यात आले आहेत. संबंधित प्रकरणांमध्ये पुढील कायदेशीर कार्यवाही सुरु आहे. नागरिकांना केवळ अधिकृत व परवानाधारक विक्रेत्यांकडूनच औषधे खरेदी करण्याचे आवाहन करण्यात आले आहे. संशयास्पद औषध विक्री किंवा बेकायदेशीर साठ्याची माहिती प्रशासनाला देण्याचे आवाहन करण्यात आले आहे. सार्वजनिक आरोग्याशी तडजोड करणाऱ्यांविरोधात कठोर कारवाई सुरूच राहणा असल्याची माहिती अन्न व औषध प्रशासनाच्या वतीनं देण्यात आली आहे.

साईबाबांच्या शिर्डीत प्रसादाच्या दुकानांवर भेसळयुक्त आणि निकृष्ट दर्जाच्या पेढ्यांची विक्री

साईबाबांच्या शिर्डीत भाविकांच्या आरोग्याशी अक्षरशः खेळ सुरू आहे. मंदिर परिसरात असणाऱ्या शेकडो प्रसादाच्या दुकानांवर भेसळयुक्त आणि निकृष्ट दर्जाच्या पेढ्यांची विक्री सुरू असल्याचं समोर आलं आहे. दररोज हजारो तर वर्षाकाठी करोडो भाविक साईबाबांच्या दर्शनासाठी शिर्डीत येतात. अनेक भाविक साई मंदिर परिसरात असणाऱ्या खाजगी दुकानदारांकडून प्रसाद विकत घेतात. मात्र या दुकानांमध्ये विकल्या जाणाऱ्या पेढा प्रसादावर पॅकेजिंग आणि एक्सपायरी डेट, तसेच हा पेढा नेमका कुठे आणि कोण बनवतो याबाबत उल्लेख नसल्याचा धक्कादायक प्रकार समोर आला आहे. प्रसादाच्या नावाखाली साईभक्तांच्या आरोग्याशी खेळ सुरू असून, शिर्डी नगरपालिकेसह अन्न व औषध प्रशासनाचे याकडे साफ दुर्लक्ष झाल आहे. निकृष्ट दर्जाच्या पेढ्यांमुळे साईभक्तांमध्ये तीव्र नाराजी असून श्रद्धेच्या नावाखाली भाविकांच्या आरोग्याशी सुरू असलेला हा खेळ थांबणार तरी कधी? असा प्रश्न उपस्थित होत आहे. एबीपी माझाच्या वृत्तानंतर अन्न व औषध प्रशासनाने शिर्डीत छापेमारी सुरु केली आहे. साई मंदिर परिसरातील पेढा प्रसाद दुकानांवरून पेढा प्रसादाचे नमुने गोळा करण्यास सुरुवात झाली आहे. प्रसाद विक्रेते दोशी आढळल्यास कारवाई होणार आहे. गेल्या काही वेळापासून अन्न औषध प्रशासनाचे पथक शिर्डीत ठाण मांडून आहे. प्रसाद विक्रेत्यांच्या दुकानावर छापेमारी सुरु आहे.