नवी दिल्ली: मंगळवारी सकाळी फ्लाइटमध्ये बॉम्बची धमकी देणारा ईमेल आल्यानंतर घबराट पसरली. सुरक्षा यंत्रणांनी प्रवाशांच्या सुरक्षेसाठी तातडीने मुंबई विमानतळावर इमर्जन्सी लँडिंग केले. हे विमान हैदराबादहून कुवेतला जात होते आणि इंडिगोचे होते. लँडिंगनंतर विमान विमानतळाच्या आयसोलेशन बेमध्ये हलवण्यात आले. सध्या या विमानाची चौकशी सुरू आहे.

सकाळची फ्लाइट

मंगळवारी सकाळी हैदराबादच्या राजीव गांधी आंतरराष्ट्रीय विमानतळावरून इंडिगोचे विमान कुवेतसाठी रवाना झाले. टेकऑफनंतर थोड्याच वेळात हैदराबाद विमानतळाला एक धमकीचा ईमेल आला, ज्यात विमानात बॉम्ब असल्याची धमकी देण्यात आली होती. यानंतर एअर ट्रॅफिक कंट्रोलने तातडीने उड्डाण वळवून ते मुंबई विमानतळावर उतरवले.

प्रवाशांना सुखरूप बाहेर काढण्यात आले आहे. त्यांचा प्रवास पूर्ण करण्यासाठी आता पर्यायी विमानांची व्यवस्था करण्यात येत आहे. अधिकाऱ्यांनी दिलेल्या माहितीनुसार, लँडिंगनंतर विमान एका आयसोलेशन बेमध्ये नेण्यात आले. बॉम्ब निकामी पथक, केंद्रीय औद्योगिक सुरक्षा दल आणि इतर सुरक्षा पथकांनी संपूर्ण तपास सुरू केला आहे. प्राथमिक तपासात आतापर्यंत कोणतेही स्फोटक साहित्य सापडलेले नाही.