पाकिस्तानचे माजी पंतप्रधान इम्रान खान यांची तुरुंगात हत्या झाल्याच्या वृत्तानंतर पाकिस्तानात प्रचंड तणाव आहे. सरकारने ही चर्चा फेटाळली असली तरी इम्रान यांचा नेमका ठावठिकाणा माहीत नसल्याने, त्यांच्याशी कोणालाही भेटू दिले जात नसल्याने, पह्नवर संपर्क करून दिला जात नसल्याने संशयकल्लोळ कायम आहे. इम्रान खान जिवंत असल्याचा पुरावा काय, असा सवाल इम्रान खान यांचा मुलगा कासीम याने आज केला. माझ्या वडिलांचे बरेवाईट झाल्यास होणाऱया परिणामांची जबाबदारी सरकारची असेल, असा इशारा त्याने दिला.
कासीम लंडनमध्ये वास्तव्यास आहे. इम्रान यांच्या हत्येच्या चर्चेनंतर कासीमने ‘एक्स’वर पोस्ट लिहून पाकिस्तान सरकारवर जोरदार टीका केली.
लक्षात ठेवा…माझ्या वडिलांचे काही बरेवाईट झाल्यास त्याची कायदेशीर, नैतिक जबाबदारी पाकिस्तान सरकार व त्यांच्या हस्तकांची असेल. आंतरराष्ट्रीय व्यासपीठावरही त्यांना जबाबदार धरले जाईल हे त्यांनी लक्षात ठेवावे, असे कासीमने सुनावले.
आंतरराष्ट्रीय समुदाय, मानवी हक्क आयोगाने हस्तक्षेप करावा. इम्रान खान जिवंत असल्याचे पुरावे मागावेत, त्यांचा अमानवी एकांतवास संपवावा आणि त्यांची सुटका होण्यास मदत करावी, असे आवाहन कासीमने केले.
Comments are closed.