सीएसके सोडण्यासाठी जडेजाची नवी अट! ही पूर्ण झाली तरच खेळणार राजस्थानसाठी

चेन्नई सुपर किंग्स आणि राजस्थान रॉयल्स यांच्यात सुरू असलेल्या ट्रेड डीलमध्ये आता नवा ट्विस्ट समोर आले आहे. आतापर्यंत अशा बातम्या समोर येत होत्या की संजू सॅमसन आगामी सीझनमध्ये चेन्नई सुपर किंग्सकडून खेळताना दिसेल.

दरम्यान, रविंद्र जडेजा आणि सॅम करन आयपीएल 2026 मध्ये राजस्थान संघाचा भाग असतील. मात्र राजस्थानमध्ये जाण्यापूर्वीच जडेजाने नवी अट ठेवली आहे. जडेजाकडे या लीगमधील मोठा अनुभव आहे आणि त्याने आपल्या दमावर सीएसकेला अनेक सामने जिंकून दिले आहेत.

रविंद्र जडेजाबाबत अशी बातमी समोर आली आहे की तो राजस्थान रॉयल्सचा कर्णधार बनू इच्छितो. न्यूज 18 क्रिकेट नेक्स्टच्या रिपोर्टनुसार, जडेजाने ट्रेड होण्यापूर्वी राजस्थानकडून कर्णधारपदाची मागणी केली आहे. असा अंदाज व्यक्त केला जात आहे की जडेजा आपल्या आयपीएल कारकिर्दीतील शेवटच्या काही वर्षांत अधिक जबाबदारी घेऊन खेळू इच्छितो.

साल 2022 मध्ये चेन्नई सुपर किंग्सने जडेजाला कर्णधारपदाची जबाबदारी दिली होती, पण हा नवा रोल त्याला अजिबात रास आला नाही आणि मध्य सिझनदरम्यानच त्याने कर्णधारपद सोडण्याचा निर्णय घेतला होता. मात्र, जडेजा बराच काळ एम.एस. धोनीच्या नेतृत्वाखाली खेळला आहे आणि माहीसोबत राहून त्याने नक्कीच कर्णधारपदाच्या बारकाव्या शिकल्या आणि समजून घेतल्या असतील.

संजू सॅमसन जर चेन्नई सुपर किंग्सच्या संघात सामील झाला, तर राजस्थानचा संघ आयपीएल 2026 साठी कर्णधारपद कोणाच्या हाती देतो हे पाहणे रंजक ठरेल. संजू जखमी झाल्यावर गेल्या सिझनमध्ये काही सामन्यांमध्ये रियान पराग संघाचे नेतृत्व करताना दिसला होता. मात्र, कर्णधार म्हणून रियानचे प्रदर्शन काही विशेष राहिले नव्हते. संघाकडे यशस्वी जायसवाल हा देखील एक पर्याय म्हणून दिसतो. तथापि, जडेजाच्या अनुभवाचा विचार करता संघ त्याच्यावर विश्वास टाकू शकतो.