लोणी येथील अजय ज्वेलर्स दुकानात झालेल्या जबरी चोरीचा गुन्हा केवळ 12 तासांत उघडकीस आणण्यात स्थानिक गुन्हे शाखेच्या पथकाला यश आले आहे. याप्रकरणी कुख्यात गुंड बबन घावटे यांच्यासह अन्य दोन साथीदारांना अटक करण्यात आली असून, दोन आरोपी फरार आहेत. पोलिसांनी कुख्यात गुंडाच्या टोळीकडून सोन्याचे नेकलेस, 5 मोबाईल, एक गावठी पिस्तूल, 2 जिवंत काडतुसे आणि चारचाकी वाहन, असा एकूण पावणे आठ लाख रुपये किमतीचा मुद्देमाल जप्त केला.
बबन भाऊसाहेब घावटे (वय 33, रा. राजापूर, ता. श्रीगोंदा), कृष्णा पोपट गायकवाड (वय 35, रा. हिंगणी, ता. श्रीगोंदा) अशी अटक केलेल्यांची नावे आहेत. तर, संकेत जाधव (रा. गोलेगाव ता. शिरूर, जि. पुणे), करण खरात (रा. हिंगणी, ता. श्रीगोंदा) हे दोघे फरार झाले आहेत.
फिर्यादी राजेंद्र नागरे (वय 54) हे 27 नोव्हेंबर 2025 रोजी दुपारी आपल्या ज्वेलर्स दुकानात असताना बबन घावटे आणि त्याचे तीन साथीदार कारमधून दुकानात आले. फिर्यादीच्या चुलतभावाच्या खुनाचा बदला घेण्यासाठी पैशांची मागणी करत आरोपींनी पिस्तुलाचा धाक दाखवत कुटुंबाला ठार मारण्याची धमकी दिली. फिर्यादीने पैसे देण्यास नकार दिल्यावर आरोपींनी काचेच्या ट्रेमधून 5 सोन्याचे नेकलेस जबरदस्तीने नेल्याचे फिर्यादित म्हटले आहे.
पोलीस अधीक्षक सोमनाथ घार्गे यांनी स्थानिक गुन्हे शाखेच्या पथकाला तपासाचे आदेश दिले. पोलीस निरीक्षक किरणकुमार कबाडी यांनी तपासासाठी दोन पथके तैनात केली होती. गुह्यातील आरोपी बेलवंडी फाटा ते श्रीगोंदा रोडने चारचाकी वाहनाने येणार असल्याची माहिती पोलिसांना मिळाली. पोलीस पथकाने सापळा लावून आरोपींना अटक केली. बबन घावटे यास गुह्याबाबत विचारपूस केली असता, त्याने कृष्णा गायकवाड, संकेत जाधव, करण खरात यांच्यासमवेत गुन्हा केल्याची कबुली दिली.
मुख्य आरोपी बबन घावटे हा कुख्यात गुंड असून, त्याच्याविरुद्ध खून, खुनाचा प्रयत्न, दरोडा, जबरी चोरी अशा गंभीर स्वरूपाच्या 10 गुह्यांची नोंद आहे.
पोलीस उपनिरीक्षक संदिप मुरकुटे, अनंत सालगुडे, रमेश गांगर्डे, गणेश लबडे, दीपक घाटकर, फुरकान शेख, रिचर्ड गायकवाड, शाम जाधव, भाऊसाहेब काळे, अमोल कोतकर, रमीझ राजा आत्तार, बाळासाहेब गुंजाळ, सागर ससाणे, प्रशांत राठोड, मनोज साखरे, सोनल भागवत, महादेव भांड, अर्जुन बडे यांच्या पथकाने ही कारवाई केली..
Comments are closed.