आयपीएल 2026 च्या तयारीला वेग आला असतानाच एक मोठी बातमी समोर आली आहे. सर्व फ्रँचायझींनी रिटेन आणि रिलीज केलेल्या खेळाडूंची यादी सादर केल्यानंतर दिल्ली कॅपिटल्सचा अनुभवी खेळाडू फाफ डु प्लेसिसने पुढील सीझनसाठी आयपीएल ऑक्शनमध्ये आपले नाव न देण्याची घोषणा केली आहे. त्यामुळे तो आयपीएल 2026 मध्ये खेळणार नाही, हे आता निश्चित झाले आहे. हा निर्णय क्रिकेटविश्वाला मोठा धक्का देणारा ठरला आहे, कारण फाफ गेली 14 वर्षे या लीगचा महत्वाचा चेहरा राहिला आहे.
दिल्ली कॅपिटल्सने या वर्षी फाफ डु प्लेसिसला रिलीज केले होते आणि अपेक्षा होती की तो ऑक्शनमधून पुन्हा एखाद्या संघात दिसेल. पण फाफने अधिकृत स्टेटमेंट जारी करत सांगितले, “IPL मधील 14 सीझननंतर मी ऑक्शनमध्ये नाव न देण्याचा निर्णय घेतला आहे. हा माझ्यासाठी अत्यंत मोठा निर्णय आहे. या लीगने मला जे काही दिले, त्याबद्दल मी सदैव कृतज्ञ राहीन.” त्याने सांगितले की IPL हा त्याच्या करिअरमधील एक महत्त्वपूर्ण टप्पा राहिला असून या लीगमुळे त्याची क्रिकेट ओळख अधिक मजबूत झाली.
फाफने भारतीय चाहत्यांप्रती भावपूर्ण कृतज्ञता व्यक्त केली. तो म्हणाला, “भारतात क्रिकेट हा धर्म आहे आणि मला या देशातील चाहत्यांसमोर खेळण्याचा मिळालेला अनुभव अमूल्य आहे. मला भारताने मैत्री, शिकवणी आणि आठवणी दिल्या आहेत. हे निश्चितपणे अलविदा नाही, भारत माझ्या हृदयात नेहमीच विशेष स्थान ठेवेल.” त्याने टीममेट्स, कोचिंग स्टाफ आणि व्यवस्थापनाचेही आभार मानत आपल्या IPL प्रवासाला सलाम केला.
आयपीएलमधून बाहेर पडत असतानाच फाफने खुलासा केला की तो आगामी पाकिस्तान सुपर लीग (PSL) मध्ये खेळण्यासाठी उपलब्ध राहील. त्याने म्हटले, “या वर्षी मी नवी आव्हानं स्वीकारण्याचे ठरवले आहे. PSL मध्ये खेळणे माझ्यासाठी एक रोमांचक टप्पा असेल.”
2012 मध्ये चेन्नई सुपर किंग्सकडून IPL पदार्पण करणाऱ्या फाफने सीएसके, आरसीबी, राइजिंग पुणे सुपरजायंट्स आणि दिल्ली कॅपिटल्सकडून खेळताना 14 हंगामांत 4773 धावा केल्या. तो सीएसके सोबत 2018 आणि 2021 मध्ये दोन वेळा आयपीएल चॅम्पियनही ठरला. अनेक निर्णायक सामन्यांतील त्याची दमदार फलंदाजी आयपीएल चाहत्यांना कायम स्मरणात राहणार आहे.
Comments are closed.