पुण्यातील गणेश काळे हत्या प्रकरणात चार आरोपींना अटक, एकाने कृष्णा आंदेकरची भेट घेतली होती

पुणे : कोंढव्यातील गणेश काळे (गणेश काळे हत्या) या रिक्षा चालकाच्या हत्या प्रकरणात पोलिसांनी चार आरोपींना अटक केली आहे. आंदेकर-कोमकर टोळीयुद्धातून (आंदेकर कोमकर टोळीयुद्ध) गणेश काळेची हत्या झाली असल्याची माहिती आहे. हत्या केल्यानंतर चारही आरोपी पळून गेले होते. या चारपैकी एक आरोपी हा कृष्णा आंदेकरचा निकटवर्तीय असल्याची माहिती आहे.

गणेश काळे हा कोमकर गँगचा सदस्य असलेल्या समीर काळेचा भाऊ आहे. समीर काळे हा आयुष कोमकर हत्या प्रकरणात सध्या तुरुंगात आहे. त्यामुळेच गणेश काळेची हत्या करण्यात आली का याचा तपास आता पुणे पोलीस करत आहेत. अटक करण्यात आलेल्या या चार आरोपींपैकी एक आरोपी हा रील स्टार आहे.

कृष्णा आंदेकर बातम्या : कृष्णा आंदेकरने हत्येचा आदेश दिला?

वनराज आंदेकरची गेल्या वर्षी हत्या करण्यात आली होती. त्यानंतर त्या हत्येचा बदला म्हणून आयुष कोमकरची हत्या करण्यात आली. या हत्या प्रकरणात वनराजचा भाऊ कृष्णा आंदेकरला पोलिसांनी अटक केली आहे. कृष्णा आंदेकरला जेव्हा वैद्यकीय तपासणीसाठी ससून रुग्णालयात नेण्यात आलं होतं, त्यावेळी त्याला भेटणाऱ्यापैकी एकाचा या आरोपींमध्ये समावेश आहे. त्यामुळे गणेश काळेच्या हत्येचा कट त्यावेळी रचण्यात आला होता, कृष्णा आंदेकरने त्यावेळी या हत्येचा आदेश दिला होता का याचा तपास आता पुणे पोलीस करत आहेत.

पुणे आंदेकर टोळी: पुण्यात आंदेकर टोळी सक्रिय

आयुष कोमकरची हत्या झाल्यानंतर आंदेकर टोळीचा प्रमुख बंडू आंदेकर, कृष्णा आंदेकर आणि इतर गुंडांना पोलिसांनी अटक केली होती. त्यानंतरही आता गणेश काळेची हत्या झाल्याने आंदेकर टोळी अजूनही सक्रिय असल्याचं दिसून येतंय. त्यामुळेच पुण्यातील कायदा आणि सुव्यस्था कितीही नियंत्रणात असल्याचा दावा पोलीस करत असले तरी टोळीयुद्धाने त्यांचा दावा उघडा पाडल्याचं दिसून येतंय.

पुणे आंदेकर कोमकर टोळीयुद्ध आंदेकर-कोमकर गँग वॉर काय?

1 सप्टेंबर 2024 रोजी नाना पेठमध्ये राष्ट्रवादीचा माजी नगरसेवक वनराज आंदेकर याची हत्या झाली. या प्रकरणात गणेश कोमकर, संजीवनी कोमकर, जयंत कोमकर आणि इतरांसह 21 आरोपींना अटक करण्यात आली.

वनराज आंदेकरच्या हत्येनंतर संतापलेल्या आंदेकर टोळीच्या सदस्यांनी त्याच्या अंत्यविधीवेळी शस्त्रपूजन करून बदला घेण्याची शपथ घेतली होती. त्याचाच एक भाग म्हणून 1 सप्टेंबर 2025 रोजी प्लॅनही आखला होता. वनराज आंदेकरच्या हत्या प्रकरणातील आरोपींची रेकी करण्यात आली होती. पण पोलिसांना याची माहिती मिळाली आणि हा प्लॅन उधळला.

गणेश विसर्जनाच्या आदल्या दिवशी आरती झाल्यानंतर नाना पेठेमध्ये गोळ्यांचा आवाज झाला. एकीकडे एका गणेश मंडळामध्ये डीजे सुरू होता, त्यामध्ये ‘टपका रे टपका, एक ओर टपका’ हे गाणं सुरू होतं. त्याचवेळी दुसरीकडे आयुष कोमकरची गोळ्या झाडून हत्या करण्यात आली. वनराज आंदेकरच्या हत्येचा बदला घेण्यासाठी आंदेकर टोळीने त्यांच्या भाच्याला म्हणजे आयुष कोमकरला ठार केलं. या घटनेनंतर पोलीस कारवाई सुरू आहे.

ही बातमी वाचा:

आणखी वाचा