भारतीय संघात पुनरागमन झाल्यानंतर ऋतुराज गायकवाडचं मोठं वक्तव्य! जाणून घ्या नेमकं काय म्हणाला?

ऋतुराज गायकवाडला (Ruturaj gaikwad) दक्षिण आफ्रिकेविरुद्धच्या 3 सामन्यांच्या वनडे मालिकेत संधी देण्यात आली आहे (ODI Series IND vs SA). निळ्या जर्सीत परत येताना तो खूप आनंदी आहे. आंतरराष्ट्रीय क्रिकेटमध्ये पुन्हा एकदा टीमसाठी योगदान देण्यासाठी तो उत्सुक आहे.

ऋतुराजने शेवटचा वनडे सामना 19 डिसेंबर 2023 रोजी दक्षिण आफ्रिकेविरुद्ध खेळला होता, तर 13 जुलै 2024 रोजी झिम्बाब्वेविरुद्ध शेवटचा टी-20 सामना खेळला होता. कर्णधार शुबमन गिलला (Shubman gill) मानेला दुखापत झाल्यामुळे तो या मालिकेत खेळणार नाही. तसेच श्रेयस अय्यरलाही (Shreyas iyer) स्प्लीन इंजरी असल्यामुळे तोही मालिकेतून बाहेर आहे. त्यामुळे ऋतुराज गायकवाडला संघात स्थान देण्यात आले आहे. के.एल. राहुलला (KL Rahul) संघाची जबाबदारी दिली आहे.

बीसीसीआयने सोशल मीडियावर (एक्स) एक व्हिडिओ पोस्ट केला आहे, ज्यामध्ये गायकवाड म्हणतो, “निळ्या जर्सीत परत येऊन खूप छान वाटत आहे. पुन्हा टीम इंडियासाठी खेळण्याची मला उत्सुकता आहे. भारताचे गोलंदाजी प्रशिक्षक मोर्ने मोर्केल (Morne Morkel) यांनी आधीच सांगितले होते की, गायकवाडचा संघात समावेश होणे खूप चांगले आहे. तो गेल्या काही वर्षांपासून दर्जेदार खेळाडू राहिला आहे. त्याला संधी मिळाली, तर तो देशाचं नाव अभिमानाने उंचावेल यात मला शंका नाही.

अलीकडेच गायकवाडने राजकोटमध्ये दक्षिण आफ्रिका ‘ए’ विरुद्धच्या वनडे मालिकेत उत्कृष्ट कामगिरी केली. त्याने 117, 68* आणि 25 अशी महत्त्वाची खेळी केली. श्रेयस अय्यर क्रमांक 4 वर खेळण्यासाठी दावेदार ठरू शकतो, तर डावखुरा तिलक वर्मा (Tilak Verma) आणि ऋषभ पंतही (Rishbh Pant) या स्थानासाठी जोरदार स्पर्धेत आहेत.

भारत आणि दक्षिण आफ्रिकेतील (IND vs SA) वनडे मालिकेचा पहिला सामना 30 नोव्हेंबर रोजी रांची येथे होईल. दुसरा सामना 3 डिसेंबरला रायपूरमध्ये आणि तिसरा सामना 6 डिसेंबरला विशाखापत्तनम येथे खेळला जाणार आहे.