महाबळेश्वरातील खड्डे बुजविण्यासाठी सिमेंटचा अतिवापर, निवडणुकीतील कार्यकर्त्यांचे बिघडतेय आरोग्य; प्रशासनाविरोधात संताप

सध्या महाबळेश्वरमध्ये इलेक्शन फिव्हरने जोर धरला आहे. निवडणूक प्रचारासाठी बाहेर पडलेले उमेदवार व त्यांचे कार्यकर्ते रस्त्यावरील धुळीमुळे त्रस्त झाले आहेत. त्यांना श्वसनाचे विकार, डोळ्यांची जळजळ मोठय़ा प्रमाणात वाढून आरोग्य बिघडण्याची चिन्हे दिसत आहेत. रस्त्यावरील खड्डे बुजविण्यासाठी करण्यात आलेल्या सिमेंटच्या अतिवापरामुळे महाबळेश्वर पर्यटनाचे भरून न निघणारे नुकसान होणार, हे मात्र निश्चित.

महाबळेश्वर इंग्रजांच्या काळातील पर्यटनस्थळ व सॅनिटोरीयम म्हणून नावारुपाला आलेले पर्यटनस्थळ आहे. इंग्रजांना त्याकाळी आरोग्याच्या दृष्टीने पोषक वातावरण महाबळेश्वर पठारावर मिळत असल्याने आरोग्यासाठी ते येथे येत असत. मात्र, आता महाराष्ट्र सरकारला पर्यटनाची व्याख्या शिकवण्याची वेळ यावेळी आली आहे. आज महाबळेश्वर या पर्यटनस्थळाची विकासाच्या नावाखाली सिमेंटचा अतिवापर करून भकासीकरणाकडे वाटचाल सुरू आहे. याचबरोबर शहरातील नागरिक व पर्यटक यांच्या आरोग्याचीदेखील मोठय़ा प्रमाणात हेळसांड होत आहे.

शहरात सध्या पालिका निवडणुकीचे वारे वाहू लागले आहे. प्रचारात सर्वजण मग्न आहेत. निवडणुकीत आपली निवड व्हावी, यासाठी इच्छूक उमेदवार घरोघरी दारोदारी फिरून भेटीगाठी घेत आहेत. मात्र, शहरात फिरताना उमेदवार व कार्यकर्त्यांना आरोग्याच्या तक्रारी जाणवत आहेत. डोळे लाल होणे, घशाच्या तक्रारी तसेच आवाज बसणे, अशा प्रकारच्या वेगवेगळ्या समस्या जाणवत आहेत. याबाबत चर्चा केली असता,  अनेकांनी सिमेंटच्या अतिवापरामुळे हा त्रास जाणवत असल्याचे बोलून दाखवले. सर्वच ठिकाणी रस्त्यांवर रस्त्यांच्या आजूबाजूकडील वनस्पतींवर मोठय़ा प्रमाणात धुळीच्या कणांचा थर दिसून येत आहे. तालुक्याला इको सेन्सिटिव्हचा नियम लागू असताना, पालिकेला विकासकामे करताना मात्र हे नियम लागू होत नाहीत का, असा सवाल नागरिक करीत आहेत.

एकेकाळी वाऱयाची झुळूक आरोग्यदायी वाटत असणाऱया महाबळेश्वरच्या हवेत आता बंदिस्त गाडय़ांमधून फिरावे लागत असून, चालणेदेखील कठीण झाले आहे. याबाबत शासनपातळीवर विचार होणार आहे की नाही, अशा संतप्त प्रतिक्रिया उमटत आहेत.

एवढय़ा वर्षांत महाबळेश्वरला धुळीचा त्रास कधीच जाणवला नाही. सिमेंटच्या अतिवापरामुळे महाबळेश्वरमध्ये सर्वत्र धुळीच्या कणांचा त्रास जाणवत आहे. ही महाबळेश्वरच्या भविष्यातील वाटचालीतील गंभीर समस्या आहे. – रियाझभाई डांगे, उद्योजक, महाबळेश्वर