‘टीएमसी’ नोकरभरतीत प्रकल्पग्रस्त,कंत्राटी कामगारांना प्राधान्य द्या! स्थानीय लोकाधिकार समितीची मागणी

‘टीएमसी’च्या नोकरभरतीमध्ये ओवे गावातील प्रकल्पग्रस्त उमेदवारांना प्राधान्य द्या, भरतीत विद्यमान कर्मचाऱयांच्या मुलांना आणि कंत्राटी कामगारांना प्राधान्य द्या, अशी मागणी स्थानीय लोकाधिकार समितीने केली आहे.

स्थानीय लोकाधिकार समिती महासंघाची टाटा मेमोरियल सेंटर, परळ, मुंबईच्या व्यवस्थानाबरोबर महत्त्वाची बैठक नुकतीच पार पडली. यावेळी टीएमसी संचालक डॉ. सुदीप गुप्ता, अॅडमिन संचालक अनिल साठे, एचआरडी सीएओ बेनी जॉर्ज यांच्यासोबत भरतीसंदर्भात चर्चा करण्यात आली. यावेळी स्थानीय लोकाधिकार समिती महासंघाचे अध्यक्ष, शिवसेना नेते-खासदार अनिल देसाई, सरचिटणीस प्रदीप मयेकर, चिटणीस दिनेश बोभाटे, संदीप गावडे, टीएमसी युनिटचे अध्यक्ष तुकाराम गवळी, सल्लागार कैलास म्हात्रे, उपाध्यक्ष रवींद्र पवार, मनीष डोळस, भारतीय कामगार सेना कॉण्ट्रक्टचे अध्यक्ष नीलेश म्हात्रे आणि सरचिटणीस अजय भोईर उपस्थित होते. यावेळी स्थानीय लोकाधिकारी महासंघाकडून करण्यात आलेल्या मागण्या पूर्ण करण्यात येतील, असा सकारात्मक प्रतिसाद ‘टीएमसी’ संचालक डॉ. सुदीप गुप्ता यांनी यावेळी दिला.

अशा केल्या मागण्या

 मागील जाहिरातीतील 22 अटेंडरच्या जागा या केवळ स्थानिक ओवे गावातील प्रकल्पग्रस्त उमेदवारांमधूनच तत्काळ भराव्यात आणि कोणत्याही अतिरिक्त अटी लागू करू नयेत.

 सध्या प्रसिद्ध झालेल्या जाहिरातीनुसार अटेंडंट व हेल्परच्या 64 जागा भरताना स्थानिक उमेदवार, विद्यमान कर्मचाऱयांच्या मुलांना, सध्याच्या कंत्राटी कामगारांना प्राधान्य द्यावे.