थोडक्यात – आठ धावांची आघाडी ठरली निर्णायक

पहिल्या डावात मिळवलेल्या आठ धावांच्या आघाडीमुळे अनंत धामणे संघाने गोविंद पाटील संघावर सरशी मिळवत ठाणे फ्रेंड्स युनियन आयोजित 16 वर्षे वयोगटाच्या दुसऱया तुकाराम सुर्वे स्मृती दोन दिवसीय क्रिकेट स्पर्धेतील आपले आव्हान जिवंत ठेवले. पहिल्या डावात 180 धावांचे आव्हान उभे केल्यावर प्रतिस्पर्ध्यांना 172 धावांवर रोखत अनंत धामणे संघाने सामन्यात पकड मिळवली होती.

या सामन्यात संघाच्या दिडशतकी धावसंख्येत ईशान काळेने 50, सार्थ पाटीलने 44 आणि अर्णव निकाळजेने 25 धावांचे योगदान दिले. या डावात आयुष चव्हाणने चार, किसन यादव आणि प्रशांत अल्लूने प्रत्येकी दोन विकेट मिळवले. त्यानंतर अर्णव मिरगेच्या 53 आणि सन्मित कोथमिरेच्या 29 धावांमुळे गोविंद पाटील संघाने 172 धावांपर्यंत मजल मारली.

अनप्लग अॅण्ड रन उद्या

ठाणे – लहानग्यांमध्ये फिटनेस, धावण्याची आवड आणि आनंदाचा उत्सव साजरा करण्यासाठी माकून्स किड्स अनप्लग्डने ‘अनप्लग अॅण्ड रन ’ या बालकांसाठी खास क्रीडा उपक्रमाचे उद्या रविवारी सकाळी 7 वाजता आयोजन केले आहे. ठाण्याच्या पवार नगर मैदान, पवार बस डेपोजवळ हा उपक्रम आयोजित केला जाणार आहे. या उपक्रमात 2 ते 10 वर्षे वयाच्या मुलांना सहभागी होता येणार आहे. संपर्क ः 9167000162/3.

कॉर्पोरेट संघांना आवाहन

मुंबई – 65 व्या शेठ नरोत्तम मोरारजी शिपिंग क्रिकेट स्पर्धेत जास्तीत जास्त कॉर्पोरेट संघांनी सहभागी व्हावे, असे आवाहन आयोजन समितीतर्फे करण्यात आले आहे. सहा दशकांहून अधिक काळ क्रिकेटचा वारसा असलेल्या या स्पर्धेला प्रायोजक लाभले आहेत. संपर्क ः 9821016219.