डहाणू : वाढवण बंदरासह इतर विविध विनाशकारी प्रकल्पाला विरोध करण्यासाठी आज (30 ऑक्टोबर) डहाणूच्या वरोर येथे भव्य जनआक्रोश सभा आणि महामोर्चाचे आयोजन करण्यात आले आहे. वरोर येथील जनआक्रोश सभेत राजकीय पक्षांसह जवळपास 40 हून अधिक विविध संघटना, मच्छीमार संस्था आणि शेतकरी गट सहभागी झाले आहेत. विकासाच्या नावाखाली पालघर जिल्ह्याची शेती, जंगल, समुद्र आणि स्थानिकांचे पारंपरिक व्यवसाय उद्ध्वस्त होणार असतील, तर असा विकास आम्हाला मान्य नाही, असा स्पष्ट संदेश जनआक्रोश सभेतून देण्यात आला.
केंद्रातील आणि राज्यातील सरकारकडून पालघरवासीयांवर लादल्या जाणाऱ्या वाढवण बंदरासह इतर विविध विनाशकारी प्रकल्पांविरोधात आज जनआक्रोश सभेचे आयोजन करण्यात आले आहे.
राजकीय पक्षांसह जवळपास 40 हून अधिक विविध संघटना, मच्छीमार संस्था आणि शेतकरी गट जनआक्रोश सभेत सहभागी झाले.
यावेळी वाढवण बंदर, मुरबे बंदर, महागाव प्रकल्प, गारगाव-खानिवडे परिसरातील दगडखाणी, चारोटी परिसरातील 131 चौरस किलोमीटर क्षेत्रातील प्रस्तावित निकेल व क्रोमियम खाणकाम, नांदगाव शिपयार्ड आणि टेक्सटाईल प्रकल्प रद्द करण्याची मागणी आंदोलकांनी केली.
वाढवण बंदरामुळे किनारपट्टीवरील मच्छीमारांचे अस्तित्व धोक्यात येण्याबरोबरच शेती, जंगल, जैवविविधता आणि मच्छीमारांच्या उपजीविकेवर गंभीर परिणाम होण्याची भीती व्यक्त करण्यात आली.
केवळ उद्योग आणि बंदरांच्या उभारणीला विकास न मानता स्थानिकांचे जीवनमान, रोजगार, पर्यावरण आणि नैसर्गिक साधनसंपत्तीचे संरक्षण यांनाही विकासाच्या केंद्रस्थानी ठेवण्याची मागणी करण्यात आली.
सरकारने स्थानिक जनतेच्या विरोधाची दखल घेऊन प्रस्तावित प्रकल्पांबाबत फेरविचार करावा, अन्यथा हा लढा अधिक व्यापक केला जाईल, असा इशारा आंदोलकांनी दिला.
Comments are closed.