उन्हाळा असो किंवा हिवाळा, अनेकांना घामामुळे शरीराला दुर्गंध येण्याची समस्या जाणवते. ऑफिस, कॉलेज किंवा प्रवासादरम्यान इतरांसमोर वावरताना शरीराच्या वासामुळे कधीकधी संकोचही वाटतो. अनेक जण हा वास घालवण्यासाठी केवळ परफ्यूम किंवा डियोड्रंटचा वापर करतात. मात्र, शरीराला येणारा दुर्गंध फक्त घामामुळे नसतो, तर त्वचेवरील बॅक्टेरिया घामातील घटकांचे विघटन करतात तेव्हा दुर्गंध निर्माण होतो. त्यामुळे केवळ सुगंधी उत्पादने वापरण्याऐवजी वैयक्तिक स्वच्छतेच्या सवयींकडे लक्ष देणं गरजेचं आहे. जाणून घ्या बॉडी ओडर टाळण्यासाठी सोप्या टिप्स
स्वच्छ आंघोळ
दररोज स्वच्छ आंघोळ केल्याने शरीरावरील घाम, धूळ आणि बॅक्टेरिया कमी होण्यास मदत होते. विशेषतः घाम जास्त येणाऱ्या दिवसांत स्वच्छतेकडे लक्ष द्यावे.
योग्य साबण
शरीर स्वच्छ करण्यासाठी सौम्य क्लिन्झर किंवा गरजेनुसार अँटीबॅक्टेरियल साबण वापरू शकता. त्वचेला त्रास होत असल्यास साबण बदलावा.
‘या भागांची विशेष काळजी
काखा, पायांची बोटे, जांघेचा भाग आणि त्वचेच्या घड्या नियमित स्वच्छ करा.
काखेतील केस ट्रिम
काखेतील केस स्वच्छ ठेवणे आणि आवश्यकतेनुसार ट्रिम करणे काहींना घाम व दुर्गंध नियंत्रित करण्यास मदत करू शकते.
स्वच्छ आणि सुती कपडे
घाम शोषून घेणारे सुती कपडे वापरा. रोज कपडे बदला आणि घामाने ओले झालेले कपडे पुन्हा वापरू नका.
शरीर कोरडे करा
आंघोळीनंतर विशेषतः काखा आणि पायांची बोटे टॉवेलने नीट पुसा. ओलसरपणा राहू देऊ नका.
अँटीपर्सपिरंट वापरा
डियोड्रंट वास कमी करण्यास मदत करते, तर अँटीपर्सपिरंट घामाचे प्रमाण कमी करते. उत्पादनाच्या सूचनांनुसार त्याचा वापर करा. रात्री कोरड्या त्वचेवर लावल्यास ते अधिक प्रभावी ठरू शकते.
आहार आणि पाणी
अतिमसालेदार पदार्थ खाल्ल्याने काही व्यक्तींना घामाचा वास अधिक जाणवू शकतो. असे पदार्थ मर्यादित ठेवा आणि दिवसभर पुरेसे पाणी प्या.
शरीराला येणारा दुर्गंध लपवण्यापेक्षा त्यामागचे कारण समजून घेणं महत्त्वाचं आहे. स्वच्छता, योग्य कपडे आणि नियमित दिनचर्या यामुळे बॉडी ओडरची समस्या कमी होण्यास मदत होते. स्वच्छ राहा आणि आत्मविश्वासाने वावरा! अचानक दुर्गंध बदलल्यास किंवा स्वच्छता राखूनही समस्या कायम राहिल्यास डॉक्टरांचा सल्ला घ्या.
Comments are closed.