लहान बाळ अंगठा चोखताना दिसले की अनेक पालकांना त्याचे कौतुक वाटते. काही वेळा ही सवय गोंडस वाटत असली तरी मूल मोठे होत असतानाही सतत अंगठा चोखत असेल, तर पालकांनी त्याकडे वेळीच लक्ष देणे गरजेचे आहे. विशेषतः झोपताना, कंटाळा आल्यावर किंवा अस्वस्थ वाटत असताना मुलांकडून ही कृती वारंवार केली जाते.
अंगठा चोखण्याची सवय का लागते?
लहान मुलांसाठी अंगठा चोखणे ही स्वतःला शांत करण्याची नैसर्गिक पद्धत असते. भूक लागणे, झोप येणे, भीती वाटणे किंवा असुरक्षितता जाणवणे अशा वेगवेगळ्या कारणांमुळे मुले अंगठा चोखतात. काही मुलांना ही सवय खेळताना किंवा टीव्ही पाहतानाही लागते. सुरुवातीच्या वयात ही सवय सामान्य मानली जाते. मात्र, वय वाढल्यानंतरही ती कायम राहिल्यास तिच्याकडे दुर्लक्ष करू नये.
सतत अंगठा चोखल्याचे परिणाम
साधारणपणे वयाच्या 3 ते 4 वर्षांपर्यंत अनेक मुले ही सवय हळूहळू सोडतात. मात्र, त्यानंतरही वारंवार आणि जोरात अंगठा चोखल्यास दातांच्या रचनेवर परिणाम होऊ शकतो. पुढचे दात बाहेरच्या दिशेने येणे, वरच्या आणि खालच्या दातांची जुळणी बिघडणे तसेच टाळूच्या आकारात बदल होण्याची शक्यता असते. काही मुलांच्या अंगठ्याच्या त्वचेवरही कोरडेपणा किंवा जखमा होऊ शकतात.
ही सवय सोडवण्यासाठी काय करावे?
मुलांना सतत ओरडणे, घाबरवणे किंवा जबरदस्तीने अंगठा तोंडातून काढणे टाळावे. त्याऐवजी मुलांना प्रेमाने समजावून सांगावे. अंगठा चोखण्याची सवय नेमकी कधी लागते, हे निरीक्षण करावे. झोपताना सवय असल्यास गोष्ट सांगणे, आवडते खेळणे देणे किंवा मिठी मारून शांत करणे असे पर्याय वापरता येतील. मुलाने अंगठा न चोखता वेळ घालवला तर त्याचे कौतुक करावे. सवय दीर्घकाळ कायम राहिल्यास बालरोगतज्ज्ञ किंवा दंततज्ज्ञांचा सल्ला घ्यावा.
Comments are closed.