'अन्याय हरला आणि सत्याचा विजय', निर्दोष सुटल्यानंतर केजरीवालांची पोस्ट!

दिल्ली दारू धोरणाशी संबंधित सीबीआय प्रकरणात शुक्रवारी राऊस एव्हेन्यू कोर्टाने आम आदमी पक्षाचे राष्ट्रीय संयोजक अरविंद केजरीवाल आणि माजी उपमुख्यमंत्री मनीष सिसोदिया यांच्यासह सर्व आरोपींची निर्दोष मुक्तता केली. न्यायालयाच्या निर्णयानंतर अरविंद केजरीवाल यांनी सोशल मीडियावर आपली प्रतिक्रिया दिली आहे.

दिल्लीचे माजी मुख्यमंत्री अरविंद केजरीवाल यांनी 'X' या सोशल मीडिया प्लॅटफॉर्मवर पोस्ट केले, “शेवटी अनीति आणि अन्यायाचा पराभव होतो आणि सत्याचा विजय होतो. सत्यमेव जयते.”

अरविंद केजरीवाल यांच्या सुटकेनंतर पत्नी सुनीता केजरीवाल यांनी प्रसारमाध्यमांशी संवाद साधताना सांगितले की, “जगात कोणी कितीही शक्तीशाली झाला तरी देवाच्या शक्तीच्या वर असू शकत नाही. अरविंद केजरीवाल यांनी आपले संपूर्ण आयुष्य संपूर्ण प्रामाणिकपणाने व्यतीत केले आहे. त्यांचे एकच ध्येय आहे की भारताने खूप प्रगती करावी.”

मात्र सत्तेच्या लालसेपोटी या लोकांनी आमच्यावर अनेक खोटे आरोप केले. अरविंद केजरीवाल आणि त्यांच्या सहकाऱ्यांची बदनामी आणि छळ केला. मला विश्वास होता की देव आपल्याला साथ देईल आणि सत्याचा विजय होईल. या कठीण काळात ज्यांनी आम्हाला साथ दिली त्यांचे मी आभारी आहे.”

दिल्लीचे माजी मुख्यमंत्री आतिशी यांनी पोस्टमध्ये लिहिले आहे की, “कितीही खोटे आरोप केले गेले, कितीही अत्याचार झाले, शेवटी सत्याचाच विजय झाला. भाजपचे कारस्थान आणि अरविंद केजरीवाल यांचा कट्टर प्रामाणिकपणा आज संपूर्ण देशासमोर आहे.”

न्यायालयाने निर्दोष मुक्तता केल्यानंतर घरी पोहोचल्यावर कुटुंबीयांनी अरविंद केजरीवाल आणि मनीष सिसोदिया यांचे पुष्पवृष्टी करून स्वागत केले. केजरीवाल यांनी पत्नी सुनीता आणि मुलांना मिठी मारली.

तत्पूर्वी, अरविंद केजरीवाल मीडियाशी बोलताना भावूक झाले होते. ते म्हणाले, “आज सत्याचा विजय झाला आहे. न्यायालयाने भाजपने रचलेल्या दारू घोटाळ्याचे सत्य समोर आले आहे. आम आदमी पार्टीला नष्ट करण्यासाठी भाजपने स्वतंत्र भारताचे सर्वात मोठे षडयंत्र रचले.

पण आज न्यायालयाने अरविंद केजरीवाल, मनीष सिसोदिया आणि आप भ्रष्ट नसल्याचे म्हटले आहे. मी माझ्या आयुष्यात फक्त प्रामाणिकपणा कमावला आहे. मला सांगायचे आहे की, सत्तेसाठी देश आणि संविधानाशी असे खेळू नका, सत्तेसाठी चांगले काम करा. चांगले काम करून सत्तेत या.”