IND vs NZ: 'या' 3 कारणांमुळे केएल राहुलने न्यूझीलंडविरूद्ध सलामीला येऊ नये?

यंदाच्या आयसीसी चॅम्पियन्स ट्रॉफीमध्ये (ICC Champions Trophy 2025) भारतीय क्रिकेट संघाची कामगिरी आतापर्यंत खूपच दमदार राहिली आहे. संघाने दोन्ही सामने जिंकून सेमीफायनलमध्ये प्रवेश केला आहे. तथापि, भारतीय संघाला रविवारी (2 मार्च) होणाऱ्या सेमीफायनलपूर्वी शेवटचा गट सामना न्यूझीलंडविरुद्ध खेळायचा आहे.

या सामन्यात भारतीय कर्णधार रोहित शर्मा (Rohit Sharma) खेळणार की नाही? याबद्दल शंका आहे. मीडिया रिपोर्ट्सनुसार, भारत-पाकिस्तान यांच्यातील सामन्यादरम्यान रोहितला स्नायूंमध्ये ताण आला. रोहित अद्याप पूर्णपणे तंदुरुस्त नाही आणि कदाचित यामुळे तो न्यूझीलंडविरुद्धच्या सामन्याला मुकू शकेल. अशा परिस्थितीत, रिषभ पंतचे (Rishabh Pant) प्लेइंग 11 मधील स्थान निश्चित आहे.

जर रोहित न्यूझीलंडविरूद्ध सामन्यात खेळला नाही तर रिषभ पंत आणि केएल राहुल यांच्यापैकी शुबमन गिलसोबत कोण सलामीला येतो हे पाहणे मनोरंजक असेल. या बातमीद्वारे आपण न्यूझीलंडविरुद्धच्या सामन्यात केएल राहुलने सलामीला का करू नये याची 3 कारणे जाणून घेऊया.

1) सलामीसाठी केएल राहुलपेक्षा रिषभ पंत हा चांगला पर्याय आहे- पंतने वनडे सामन्यात फक्त एकदाच सलामी दिली असेल, पण कोणत्याही स्थानावर खेळताना वेगवान गतीने धावा काढण्याची उत्तम कला त्याच्याकडे आहे. पंत पहिल्या चेंडूपासून मोठे फटके मारण्यास सक्षम आहे. याच्या मदतीने तो विरोधी गोलंदाजांवर वर्चस्व गाजवू शकतो, ज्याचा फायदा संपूर्ण संघाला होऊ शकतो. अशा परिस्थितीत राहुलऐवजी पंतला सलामीला खेळायला लावणे अधिक फायदेशीर ठरेल.

2) स्ट्राइक रेटची समस्या- केएल राहुल हा संघातील सर्वात प्रतिभावान खेळाडूंपैकी एक आहे यात शंका नाही, परंतु त्याच्या स्ट्राईक रेटमुळे त्याला नेहमीच टीकेचा सामना करावा लागतो. राहुलने वनडे सामन्यात सलामीला जाताना 23 सामन्यांमध्ये 912 धावा केल्या आहेत, परंतु या काळात त्याचा स्ट्राइक रेट 80च्या खाली राहिला आहे. सुरुवातीच्या सामन्यात, संघाला अशा फलंदाजाची आवश्यकता असते जो जलद गतीने धावा काढू शकेल आणि संघाला चांगली सुरुवात देऊ शकेल.

3) केएल राहुल चांगल्या फॉर्ममध्ये नाही- यष्टीरक्षक फलंदाज केएल राहुलचा सध्याचा फॉर्म काही खास नाही. बांगलादेशविरुद्धच्या सामन्यात त्याने नाबाद 41 धावा केल्या असल्या तरी, जर त्याचा झेल सोडला नसता तर तो लवकर बाद झाला असता. त्या सामन्यापूर्वी, इंग्लंडविरुद्धच्या पांढऱ्या चेंडूच्या मालिकेतही राहुलची बॅट शांत होती. अशा परिस्थितीत राहुलला डावाची सुरुवात करायला लावणे संघासाठी महागात पडू शकते.

महत्त्वाच्या बातम्या-

‘पैसे परत करा’ – पाकिस्तानी चाहत्यांचा संताप, PCBचा मोठा निर्णय
पाकिस्तान पाठोपाठ इंग्लंडही रिकाम्या हाताने घरी, दक्षिण आफ्रिकेचा दणदणीत विजय
“रमीझ राजा पुन्हा ट्रोल्सच्या निशाण्यावर, रोनाल्डोच्या आहाराबाबत केलेल्या वक्तव्यामुळे सोशल मीडियावर खिल्ली!”