मेक्सिकोमध्ये ६.५ रिश्टर स्केल तीव्रतेचा भूकंप: दोन जणांचा मृत्यू, राष्ट्रपतींची पत्रकार परिषद मध्यंतरी थांबली

मेक्सिको सिटी: शुक्रवारी दक्षिण आणि मध्य मेक्सिकोमध्ये झालेल्या भूकंपाच्या धक्क्याने किमान दोन जणांचा मृत्यू झाला. या भूकंपामुळे देशाच्या राष्ट्राध्यक्ष क्लॉडिया शीनबॉम यांची नवीन वर्षातील पहिली पत्रकार परिषद उधळली गेली. मेक्सिकोच्या राष्ट्रीय भूकंप एजन्सीनुसार, भूकंपाची प्राथमिक तीव्रता 6.5 इतकी होती आणि पॅसिफिक किनारपट्टीवरील अकापुल्कोच्या रिसॉर्टजवळ, दक्षिणेकडील गुरेरो राज्यातील सॅन मार्कोस शहराजवळ त्याचे केंद्र होते. 500 हून अधिक आफ्टरशॉकही जाणवले.

राज्य नागरी संरक्षण एजन्सीने अहवाल दिला आहे की अकापुल्को आणि राज्यातील इतर महामार्गांभोवती अनेक ठिकाणी भूस्खलन झाले. ग्युरेरोचे गव्हर्नर एव्हलिन सालगाडो यांनी सांगितले की, भूकंपाच्या केंद्राजवळ राहणाऱ्या 50 वर्षीय महिलेचे घर कोसळल्याने तिचा मृत्यू झाला.

अधिकाऱ्यांनी सांगितले की, ग्युरेरोची राजधानी असलेल्या चिल्पॅन्सिंगो येथील रुग्णालयाला गंभीर संरचनात्मक नुकसान झाले आहे आणि अनेक रुग्णांना बाहेर काढण्यात आले आहे. मेक्सिको सिटीच्या महापौर क्लारा ब्रुगाडा यांनी सांगितले की, भूकंपात आणखी एकाचा मृत्यू झाला.

यूएस जिओलॉजिकल सर्व्हे (यूएसजीएस) नुसार, भूकंप 21.7 मैल (35 किलोमीटर) खोलीवर आला आणि त्याचा केंद्रबिंदू रँचो व्हिएजो, गुरेरोच्या उत्तर-वायव्येला 2.5 मैलांवर होता. हे क्षेत्र डोंगराळ प्रदेशात आहे आणि अकापुल्कोच्या उत्तर-पूर्वेस सुमारे 57 मैलांवर आहे. भूकंपानंतर लगेचच शीनबॉम यांनी आपली पत्रकार परिषद पुन्हा सुरू केली.