सध्या शाळकरी मुलांच्या परीक्षांचा हंगाम सुरू असून मुंबईकर उन्हाळी सुट्टीत गावी जाण्याचे प्लॅनिंग करू लागले आहेत. या अनुषंगाने एसटी महामंडळ उन्हाळी सुट्टीत प्रवाशांना थंडगार प्रवासाचा अनुभव देण्यासाठी सज्ज झाले आहे. राज्यभर 872 वातानुकूलित शिवशाही बसेस प्रवाशांच्या सेवेत धावणार आहेत. उन्हाळय़ातील प्रवाशांची वाढती मागणी विचारात घेऊन एसटी महामंडळाने पुरेशा वातानुकूलित शिवशाही बसेस चालवण्याचा निर्णय घेतला आहे.
उन्हाळी सुट्टीत मुंबईहून कोकण तसेच राज्याच्या इतर भागांत जाणाऱ्या चाकरमान्यांचे प्रमाण अधिक असते. एकीकडे रेल्वेने अतिरिक्त सेवा सुरू केली तरी राज्याच्या ग्रामीण भागात जाण्यासाठी प्रवासी लाल परीला पसंती देतात. प्रवाशांचा हा कल एसटी महामंडळाच्या उत्पन्नात भर टाकू शकतो, या अनुषंगाने महामंडळाने एप्रिल आणि मे महिन्यात 872 वातानुकूलित शिवशाही बसेस चालवण्याचा निर्णय घेतला आहे. यात मध्यम आणि लांब पल्ल्याच्या गाडय़ांचा समावेश असणार आहे. मुंबई सेंट्रल व परळ आगारातूनही अतिरिक्त गाडय़ा सोडण्यात येणार आहेत. शिवशाही बसची सेवा मुंबईतून राज्यभरात पुणे, नाशिक, रत्नागिरी, कोल्हापूर, संभाजीनगर, जळगाव, बीड, नागपूर, अहिल्यानगर अशा विविध ठिकाणी सुरू राहणार आहे. उन्हाळी सुट्टीत खासगी ट्रव्हल्सवाले प्रवाशांकडून भरमसाट पैसे उकळतात. अशा परिस्थितीत अनेक प्रवासी एसटी बसेसकडे वळतात. त्यामुळे अतिरिक्त शिवशाही बसेसना प्रवाशांचा चांगला प्रतिसाद मिळेल, अशी अपेक्षा वरिष्ठ अधिकाऱ्यांनी व्यक्त केली आहे.
लवकरच 2640 नवीन एसी गाडय़ा
एसटी महामंडळाच्या ताफ्यात नजीकच्या काळात 2640 नवीन ‘लाल परी’ गाडय़ा दाखल होणार आहेत. दर महिन्याला 300 गाडय़ा अशाप्रकारे टप्प्याटप्प्याने नवीन लाल परी प्रवाशांच्या सेवेत दाखल केल्या जाणार आहेत. राज्याच्या खेडय़ापाडय़ातील नागरिकांना याचा फायदा होणार आहे.
राज्यातील वाढत्या उष्णतेच्या पार्श्वभूमीवर मोठय़ा प्रमाणावर प्रवासी वातानुकूलित बसेसकडे वळत आहेत. प्रवाशांची वाढती मागणी विचारात घेत उन्हाळी सुट्टीत 872 शिवशाही बसेस प्रवासी सेवेत धावणार आहेत. तसेच जादा लाल परी गाडय़ा सोडण्याचेही नियोजन केले जात आहे.
नितीन मैंद, महाव्यवस्थापक, एसटी महामंडळ
Comments are closed.