आयुर्वेदात फक्त काढे आणि औषधी नाही तर शस्त्रक्रियाही; वाचा तज्ञांचा सल्ला

आपण आयुर्वेद म्हटलं की आपल्या डोळ्यांसमोर येतात ते काढे, औषधी वनस्पती, तेलं, बस्ती किंवा पंचकर्मासारख्या उपचार पद्धती. पण तुम्हाला ठाऊक आहे का की आयुर्वेद फक्त औषधी किंवा नैसर्गिक उपचारापुरता मर्यादित नाही? आज आयुर्वेदिक शास्त्र इतकं विकसित झालं आहे की गरज पडल्यास शस्त्रक्रिया देखील याच माध्यमातून केली जाऊ शकते. विशेष म्हणजे, हे उपचार स्त्रीरोग (Gynecology) क्षेत्रातही मोठ्या प्रमाणावर यशस्वी ठरत आहेत. (ayurveda surgery and womens health treatment)

आयुर्वेदिक गायनकोलॉजी म्हणजे स्त्रीरोगांच्या उपचारासाठी पारंपरिक आयुर्वेदिक तत्वांबरोबर आधुनिक शस्त्रक्रिया पद्धतींचा संगम आहे. यामध्ये रुग्णाच्या आजाराची स्थिती पाहून त्यानुसार पंचकर्म, औषधी उपचार, किंवा गरज भासल्यास शस्त्रक्रिया केली जाते. म्हणजेच, आयुर्वेदात केवळ औषधी नव्हे, तर सर्जिकल पद्धतींचाही योग्य समन्वय साधला जातो.

अनेकदा स्त्रियांच्या शरीरात काही रचनात्मक विकृती (Anatomical Disorders) निर्माण होतात. उदाहरणार्थ, गर्भाशयात गाठी तयार होणं (Fibroids), गर्भाशयाची पिशवी बिघडणं, किंवा बाळाची चुकीची स्थिती (Transverse Position) अशा परिस्थितींमध्ये फक्त औषधी उपचार पुरेसे ठरत नाहीत. अशावेळी आयुर्वेदिक डॉक्टरांकडून शस्त्रक्रियाही केली जाते. यामध्ये सिझेरियन सेक्शन, गर्भाशय निर्हरण (Hysterectomy), किंवा गर्भाशयातील गाठी काढणे अशा विविध प्रक्रिया केल्या जातात.

परंतु प्रत्येक केसमध्ये शस्त्रक्रिया आवश्यकच असते असं नाही. काही स्त्रियांना केवळ हार्मोनल असंतुलनामुळे पाळी अनियमित होणं, अतिरक्तस्त्राव, थकवा, किंवा मानसिक अस्वस्थता जाणवते. अशा वेळी आयुर्वेदिक पंचकर्म, उत्तरवस्ती, आणि नैसर्गिक औषधोपचार यांच्या साहाय्याने रुग्ण पूर्णपणे बरा होऊ शकतो. उदाहरणार्थ, उत्तरवस्ती हा असा उपचार आहे ज्यामध्ये गर्भाशयात निर्जंतुक औषधी दिल्या जातात, ज्यामुळे शरीरातील विकार नष्ट होतात आणि पाळी नियमित होते.

या पद्धतीमुळे अनेक स्त्रियांना अनावश्यक शस्त्रक्रिया टाळता आली आहे. आयुर्वेदाचा उद्देश फक्त आजार दूर करणं नाही, तर शरीर आणि मन यांचं संतुलन साधून आरोग्यदायी जीवनशैली निर्माण करणं हा आहे. आधुनिक वैद्यकशास्त्र आणि आयुर्वेद यांचं एकत्रित रूप आज रुग्णासाठी सर्वात परिणामकारक ठरतंय.

पूर्ण व्हिडिओ पहा:

https://www.youtube.com/watch?v=ffqgbqeim9g

शेवटी आयुर्वेद आज फक्त ‘काढा’ किंवा ‘हर्बल ट्रीटमेंट’ पुरतं मर्यादित राहिलेलं नाही. शास्त्रीय पद्धतीने सिद्ध झालेल्या या उपचारांमध्ये शस्त्रक्रियेपासून पंचकर्मापर्यंत सर्वकाही आहे. योग्य निदान आणि संतुलित उपचार यांच्या सहाय्याने स्त्रियांच्या आरोग्याचा पाया आयुर्वेद अधिक मजबूत करत आहे.