पावसाळा म्हणजे फक्त थंडगार वारे आणि रिमझिम सरींचा आनंद नाही, तर आपल्या स्टाइलमध्येही नवा ताजेपणा आणण्याची संधी असते. मात्र या दिवसांत चिखल, पाण्याचे डबके आणि सततची ओलसर हवा यामुळे फॅशनची निवड करताना थोडी जास्त काळजी घ्यावी लागते. अनेकदा आवडते कपडे भिजल्यामुळे किंवा खराब झाल्यामुळे संपूर्ण दिवसाचा मूड बिघडतो. पण योग्य ड्रेस निवडल्यास पावसाळ्यातही तुम्ही कम्फर्ट आणि स्टाइल मिळवू शकता. जाणून घेऊया अशाच पाच फॅशन आयडियाज, ज्या या मोसमात तुमचा लूक अधिक आकर्षक बनवू शकतात.
1. गुडघा-लांबीचा शर्ट ड्रेस
पावसाळ्यासाठी गुडघ्यांपर्यंतचे ड्रेस हा एक उत्तम पर्याय आहे. लांब कपड्यांच्या तुलनेत हे ड्रेस सहज भिजत नाही आणि दिवसभर आरामदायक वाटते. ऑफिस, कॅज्युअल आउटिंग किंवा मित्रमैत्रिणींसोबतच्या भेटीसाठी हा लूक परफेक्ट ठरतो. हलक्या रंगांपेक्षा ब्राइट किंवा प्रिंटेड डिझाइन्स निवडल्यास तुमचा लूक आणखी उठून दिसू शकतो.
2. शॉर्ट कुर्ती आणि अँकल-लेंथ स्ट्रेट पँट
भारतीय पोशाख आवडणाऱ्या महिलांसाठी हा पर्याय खास आहे. शॉर्ट कुर्तीसोबत अँकल-लेंथ स्ट्रेट पँट परिधान केल्यास कपडे लवकर भिजण्याची चिंता राहत नाही. हा लूक साधा, एलिगंट आणि रोजच्या वापरासाठी योग्य आहे. ऑफिस, कॉलेज किंवा दैनंदिन कामांसाठीही ही स्टाइल सहज कॅरी करता येते.
3. मिडी ड्रेस
मिडी ड्रेस ही अशी फॅशन आहे जी आराम आणि स्टाइल दोन्ही देते. ती ना खूप लांब असते ना खूप छोटी, त्यामुळे पावसाळ्यात ती वापरणे सोयीचे ठरते. बेल्ट, जॅकेट किंवा साध्या अॅक्सेसरीजसह ही ड्रेस विविध पद्धतींनी स्टाइल करता येते. त्यामुळे प्रत्येक वेळी वेगळा आणि फ्रेश लूक मिळतो.
4. ट्राउजर आणि ओव्हरसाइज शर्ट
सध्या ओव्हरसाइज शर्टचा ट्रेंड मोठ्या प्रमाणावर लोकप्रिय आहे. ट्राउजरसोबत हा लूक केवळ फॅशनेबलच नाही, तर पावसाळ्यातही खूप उपयोगी ठरतो. लांब जीन्स किंवा वाइड-लेग पँटच्या तुलनेत हा पर्याय अधिक सोयीस्कर वाटतो. ऑफिस किंवा कॉलेजमध्ये स्टायलिश दिसण्यासाठी हा लूक उत्तम पर्याय ठरू शकतो.
5. स्कर्ट-शॉर्ट्स संयोजन
स्कर्टसारखा दिसणारा पण आतून शॉर्ट्स असलेला हा पर्याय सध्या तरुणींमध्ये विशेष लोकप्रिय आहे. चालताना, जिने चढताना किंवा प्रवास करताना यामध्ये अधिक आराम मिळतो. पावसाळ्यातील हालचालींसाठी ही स्टाइल अत्यंत सोयीची असून ती तुम्हाला ट्रेंडी लुक देते.
पावसाळ्यासाठी अतिरिक्त टिप्स
पावसाळ्यात शक्यतो हलक्या आणि लवकर सुकणाऱ्या फॅब्रिकची निवड करा. खूप लांब कपडे टाळा आणि आरामदायक फुटवेअर वापरा. तसेच चमकदार रंग आणि आकर्षक प्रिंट्स निवडल्यास ढगाळ वातावरणातही तुमचा लूक उठून दिसेल. पेस्टल कलर वापरू नका पावसाळ्यात चिखल उडण्याची शक्यता जास्त असते त्यामुळे असे रंग टाळा आणि गडद रंगाचा वापर करा.
Comments are closed.