पावसाळा आला की थंडगार वातावरणासोबत अनेक घरांमध्ये आणखी एक चिंता डोकं वर काढते पिण्याच्या पाण्याची. मुसळधार पावसानंतर विहीर, बोअरवेल किंवा टाकीतील पाणी गढूळ होणं ही सामान्य बाब असली, तरी दुर्लक्ष केल्यास हेच पाणी पोटाच्या गंभीर आजारांना आमंत्रण देऊ शकतं. अशावेळी जुन्या पिढीचा एक सोपा उपाय आजही अनेक घरांत वापरला जातो तुरटी. मात्र, तुरटी वापरताना काही महत्त्वाच्या गोष्टी लक्षात ठेवणं तितकंच आवश्यक आहे.
तुरटी पाणी स्वच्छ कशी करते?
पावसामुळे पाण्यात माती, धूळ आणि इतर सूक्ष्म कण मिसळतात. अशा वेळी पाण्यात तुरटीचा छोटा तुकडा फिरवल्यास हे कण एकत्र येऊन तळाशी बसतात आणि पाणी तुलनेने स्वच्छ दिसू लागते. मात्र, हा उपाय फक्त गाळ खाली बसवण्यासाठी मदत करतो. जिवाणू आणि विषाणू पूर्णपणे नष्ट करण्यासाठी पाणी उकळणं किंवा योग्य पद्धतीने निर्जंतुक करणं आवश्यक आहे.
स्वच्छ पाणी पिण्यासाठी 5 सोपे उपाय
1. तुरटीचा वापर
गढूळ पाण्यात तुरटीचा छोटा तुकडा हलक्या हाताने फिरवा. काही वेळात गाळ खाली बसू लागेल. त्यानंतर वरचं स्वच्छ पाणी वेगळं घ्या आणि ते उकळूनच प्या.
2. पाणी उकळून प्या
पाणी स्वच्छ दिसत असलं तरी त्यात सूक्ष्मजीव असू शकतात. त्यामुळे पाणी उकळून थंड झाल्यावरच पिण्याचा वापर करा.
3. कापड किंवा वॉटर फिल्टरचा वापर
मोठे कण काढण्यासाठी आधी पाणी स्वच्छ कापडातून किंवा फिल्टरमधून गाळा. त्यामुळे पुढील प्रक्रिया अधिक प्रभावी होते.
4. पाणी झाकून ठेवा
उघड्या भांड्यात ठेवलेलं पाणी पुन्हा दूषित होऊ शकतं. त्यामुळे नेहमी झाकण असलेल्या स्वच्छ भांड्यातच पाणी साठवा.
5. पाण्याची भांडी स्वच्छ करा
घरातील पाण्याची टाकी, माठ किंवा स्टोरेज कंटेनर वेळोवेळी धुतल्यास बॅक्टेरिया आणि शेवाळ वाढण्याचा धोका कमी होतो.
Comments are closed.