Israel Iran War – युद्धाची किंमत मी देखील चुकवतोय; क्षेपणास्त्र हल्ल्याच्या भीतीनं मुलाचं लग्न दुसऱ्यांदा पुढे ढकलल्यानं नेतन्याहू व्यथित

इस्रायल आणि इराणमधील युद्ध आठव्या दिवशीही सुरू आहे. यामुळे जगाची चिंता वाढली असून मध्यपूर्वेकडील आकाशामध्ये महायुद्धाचे ढग जमा होऊ लागले आहेत. बुधवारी अमेरिकेचे राष्ट्राध्यक्ष डोनाल्ड ट्रम्प यांनी इराणचे सर्वोच्च नेते अयातुल्ला खोमेनी यांना ‘बिनशर्त आत्मसमर्पण’ करण्यास सांगितले होते. मात्र अमेरिकेच्या या धमकीला इराणने भीक घातली नाही आणि इस्रायलच्या प्रमुख शहरांवर क्षेपणास्त्रांचा तुफान मारा केला. यात इस्रायलचे मोठे नुकसान झाले आहे. इस्रायलचे पंतप्रधान बेंजामिन नेतन्याहू यांनीही अप्रत्यक्षपणे याची कबुली दिली असून या युद्धाची किंमत प्रत्येक जण चुकवत असल्याचे म्हटले. तसेच इराणसोबत सुरू असलेल्या युद्धामुळे मुलाचे लग्न दुसऱ्यांदा पुढे ढकलले गेल्याचेही त्यांनी सांगितले. यावरून त्यांना इस्रायलच्या नागरिकांनी ट्रोलही केले आहे.

मंगळवारी रात्री इराणने अधिकृतपणे युद्धाची घोषणा केली. त्यानंतर गुरुवारी सकाळी इराणने तेल अवीव, बेअरशेबा, रमत गान आणि होलोन या 4 प्रमुख इस्रायली शहरांवर क्षेपणास्त्र हल्ला केला. तेल अवीवमधील इस्रायली स्टॉक एक्स्चेंज इमारत आणि बीअरशेबा येथील सोरोका रुग्णालयाबरोबर विविध ठिकाणी 30 क्षेपणास्त्रे डागण्यात आली. यात इस्रायलचे 176 हून अधिक लोक जखमी झाले आहेत. या हल्ल्यानंतर इस्रायलचे पंतप्रधान नेतन्याहू यांनी सोरोका रुग्णालयाला भेट दिली.

इराणने इस्रायलचा शेअरबाजार उडवला, रुग्णालयही उडवले; 176 लोक जखमी