करुण नायरने रचला नवा इतिहास; असं करणारा जगातील एकमेव खेळाडू!

इंग्लंडविरुद्धच्या पहिल्या कसोटी सामन्यासाठी करुण नायर पुन्हा एकदा प्लेइंग इलेव्हनमध्ये परतला आहे. त्याने देशांतर्गत क्रिकेटमध्ये खूप धावा केल्या त्यानंतर त्याने आयपीएल 2025 मध्ये दिल्ली कॅपिटल्ससाठीही आपली चमक दाखवली. त्याची क्षमता पाहून त्याला भारतीय कसोटी संघात संधी मिळालीच नाही तर प्लेइंग इलेव्हनमध्येही प्रवेश मिळाला.

करुन नायरने 2017 मध्ये भारतीय संघासाठी शेवटचा सामना खेळला होता. आता तो 8 वर्षांनी प्लेइंग इलेव्हनमध्ये परतला आहे. या दरम्यान, करुणने भारतीय संघासाठी एकूण 402 आंतरराष्ट्रीय सामने गमावले. आंतरराष्ट्रीय क्रिकेटमध्ये सर्वाधिक सामने गमावण्याचा त्याने विश्वविक्रम केला आहे. तो क्रिकेट जगातील एकमेव खेळाडू आहे ज्याने 400 हून अधिक सामने गमावले आहेत. यापूर्वी हा विक्रम वेस्ट इंडिजच्या रायद अमृतच्या नावावर होता. 2007 ते 2018 दरम्यान तो वेस्ट इंडिज संघासाठी एकूण 396 आंतरराष्ट्रीय सामने गमावला. आता नायरने त्याचा विक्रम मोडला आहे.

करुण नायरने 2016 मध्ये भारतीय संघासाठी कसोटी पदार्पण केले. तेव्हापासून त्याने एकूण 6 कसोटी सामन्यांमध्ये 374 धावा केल्या आहेत, ज्यामध्ये एक त्रिशतकही आहे. नायरने इंग्लंडविरुद्ध त्रिशतक झळकावले. पण पुढच्याच सामन्यात त्याला बाहेरचा रस्ता दाखवण्यात आला. याशिवाय, त्याने भारतीय संघासाठी दोन एकदिवसीय सामनेही खेळले, ज्यामध्ये त्याने 46 धावा केल्या.

इंग्लंडविरुद्धच्या पहिल्या कसोटी सामन्यात, फलंदाजीसाठी आमंत्रित झाल्यानंतर भारतीय संघाने तीन विकेट गमावून 359 धावा केल्या आहेत. शुबमन गिल आणि यशस्वी जयस्वाल यांनी दमदार शतके झळकावली आहेत. या दोघांनी मिळून इंग्लंडच्या गोलंदाजांना धुडकावून लावले आहे. जयस्वालने 101 धावा केल्या. गिल अजूनही 127 धावांसह क्रीजवर आहे. रिषभ पंतने 65 धावा केल्या आहेत. इंग्लंडसाठी बेन स्टोक्सने सर्वाधिक दोन विकेट घेतल्या.