मोहम्मद सिराजची कमाल! बुमराहचा विक्रम मोडत ठरला नंबर वन आशियाई गोलंदाज

भारत विरुद्ध इंग्लंड पाच सामन्यांच्या कसोटी मालिकेतील पाचवा आणि शेवटचा सामना लंडनमधील केनिंग्टन ओव्हल मैदानावर खेळला जात आहे. या सामन्यात भारताचा वेगवान गोलंदाज मोहम्मद सिराजच्या विध्वंसक गोलंदाजीला यजमान संघाकडे उत्तर नव्हते. सिराजने इंग्लंडच्या पहिल्या डावात 4 बळी घेतले आणि इंग्लंड संघाला 247 धावांत गुंडाळण्यास मदत केली. या 4 बळींसह, सिराज सध्याच्या भारत विरुद्ध इंग्लंड कसोटी मालिकेत सर्वाधिक बळी घेणारा गोलंदाज बनला आहेच, तर तो इंग्लंडमध्ये सर्वाधिक 4 बळी घेणारा नंबर-1 आशियाई गोलंदाजही बनला आहे.

त्याने या बाबतीत जसप्रीत बुमराहचा विक्रम मोडला आहे. बुमराहने आतापर्यंत इंग्लंडमध्ये पाच वेळा एका डावात 4 बळी घेतले आहेत. मोहम्मद सिराजच्या कारकिर्दीत इंग्लंडच्या भूमीवर एका डावात 4 बळी घेण्याची ही सहावी वेळ आहे.

यासह, मोहम्मद सिराजने श्रीलंका आणि पाकिस्तानचे दिग्गज गोलंदाज मुथय्या मुरलीधरन आणि वकार युनूस यांची बरोबरी केली आहे. या दोन्ही दिग्गज खेळाडूंनी इंग्लंडमध्ये 6-6 चार बळी घेतले आहेत.

इंग्लंड कसोटीत सर्वाधिक फोर विकेट हाॅल (आशियाई गोलंदाज)

6 – मोहम्मद सिराज*
6 – मुथ्या मुरलीथारन
6 – वकार युनुस
5- जसप्रीत बुमराह
5 – मोहम्मद आमिर
5- यासिर शाह

सामन्याबद्दल बोलायचे झाले तर, नाणेफेक गमावल्यानंतर प्रथम फलंदाजी करण्यासाठी आलेला भारतीय संघ पहिल्या डावात 224 धावांवर ऑलआउट झाला. प्रत्युत्तरात इंग्लंडला फक्त 247 धावा करता आल्या. मोहम्मद सिराज व्यतिरिक्त, प्रसिद्ध कृष्णानेही भारताकडून 4 बळी घेतले. दुसऱ्या दिवसाच्या खेळाच्या अखेरीस, भारताने दुसऱ्या डावात 2 बळी गमावून 75 धावा केल्या आहेत. यशस्वी जयस्वाल अर्धशतक झळकावल्यानंतर क्रिजवर उपस्थित आहे.