सैन्य अधिकारी विमानतळावर अनागोंदी तयार करतात

अतिरिक्त सामानावरून स्पाईसजेटच्या चार कर्मचाऱ्यांना मारहाण : श्रीनगरमधील घटना

सर्कल संस्था/ श्रीनगर

जम्मू काश्मीरमधील श्रीनगर विमानतळावर एका लष्करी अधिकाऱ्याने स्पाईसजेटच्या चार कर्मचाऱ्यांना मारहाण करत गोंधळ घातला. अतिरिक्त सामानावरून झालेल्या या वादानांतर झालेल्या मारहाणीत एका कर्मचाऱ्याच्या पाठीच्या कण्याला गंभीर दुखापत झाली. तर अन्य एका कर्मचाऱ्याच्या जबड्याला जबर दुखापत झाली आहे. तिसऱ्याच्या नाकातून रक्त होईपर्यंत मारहाण झाली असून चौथा कर्मचारी बेशुद्ध पडला असूनही त्याला लष्करी अधिकाऱ्याकडून लाथा-बुक्क्यांनी मारहाण सुरू असल्याचा प्रकार उघड झाला आहे. ही घटना 26 जुलैची असून आता ही बाब उघडकीस आली आहे. या गंभीर घटनेबाबत सदर लष्करी अधिकाऱ्याला नो-फ्लाइंग लिस्टमध्ये टाकण्यात आले आहे. लष्करानेही या प्रकरणाची दखल घेत आरोपीवर कारवाई केली जाईल असे म्हटले आहे.

मारहाण करणाऱ्या लष्करी अधिकाऱ्याचे नाव लेफ्टनंट कर्नल रितेश कुमार सिंग असे आहे. तो गुलमर्ग येथील हाय अल्टिट्यूड वॉरफेअर स्कूल येथे तैनात आहे. पोलिसांनी त्याच्याविरोधात एफआयआर नोंदवला असला तरी अद्याप कोणालाही अटक झालेली नाही. या हल्ल्याप्रकरणी पोलिसांकडे एफआयआर दाखल करण्यात आला असून विमान कंपनीने प्रवाशाला नो-फ्लाय लिस्टमध्ये टाकण्याची प्रक्रिया सुरू केली आहे, असे स्पाईसजेटच्या प्रवक्त्यांनी सांगितले. लष्करी अधिकाऱ्याविरोधात नागरी विमान वाहतूक नियमांनुसार कारवाई केली जात आहे. विमान कंपनीने नागरी विमान वाहतूक मंत्रालयाला या गंभीर हल्ल्याची लेखी माहिती दिली आहे. तसेच विमानतळ अधिकाऱ्यांकडून मिळालेले सीसीटीव्ही फुटेज पोलिसांना देण्यात आले आहे.

विमान वाहतूक मंत्रालयाशी पत्रव्यवहार

याप्रकरणी नागरी विमान वाहतूक मंत्रालयालाही पत्र पाठवण्यात आले आहे. आरोपीविरुद्ध एफआयआर दाखल करण्यात आल्याचे एअरलाईनने म्हटले आहे. नागरी विमान वाहतूक नियमांनुसार, प्रवाशाला नो-फ्लाय लिस्टमध्ये टाकण्यात आले आहे. स्पाईसजेटने नागरी विमान वाहतूक मंत्रालयाला पत्र लिहून कर्मचाऱ्यांवरील प्राणघातक हल्ल्याची माहिती दिली. तसेच सदर प्रवाशाविरुद्ध योग्य कारवाई करण्याची विनंती केली आहे.

नेमके काय घडले?

26 जुलै रोजी, स्पाइसजेटचे विमान एसजी-386 श्रीनगरहून दिल्लीला जात होते. बोर्डिंग गेटवर एका प्रवाशाने लष्करी अधिकारी असल्याचे सांगत चार कर्मच्रायांवर हल्ला केला. एअरलाइनच्या म्हणण्यानुसार, आरोपी अधिकारी दोन केबिन बॅगा घेऊन जात होता. त्या बॅगांचे एकूण वजन 16 किलो होते. हे वजन 7 किलोच्या मर्यादेपेक्षा दुप्पट होते. स्पाइसजेटच्या कर्मचाऱ्यांनी प्रवाशाला तुमचा सामान निर्धारित मानकांपेक्षा जास्त असल्यामुळे तुम्हाला जास्त पैसे द्यावे लागतील, असे सांगितले. यावर सदर लष्करी अधिकाऱ्याने जास्त पैसे देण्यास नकार दिला. त्यानंतर, तो बोर्डिंग प्रक्रिया पूर्ण न करता जबरदस्तीने एरोब्रिजमध्ये घुसला. हे सुरक्षा नियमांचे उल्लंघन होते. कर्मचाऱ्यांनी आरोपीला थांबवण्याचा प्रयत्न केला तेव्हा त्याने त्यांना मारहाण करण्यास सुरुवात केली. त्याने त्यांना लाथा आणि बुक्केही मारले. यात काहींना जबड्याला दुखापत झाली तर एक कर्मचारी जमिनीवर बेशुद्ध पडला. जखमी कर्मचाऱ्यांना रुग्णालयात दाखल करण्यात आले आहे.