झिम्बाब्वे विरुद्ध न्यूझीलंड यांच्यातील दोन सामन्यांच्या कसोटी मालिकेतील दुसरा सामना बुलावायो येथील क्वीन्स स्पोर्ट्स क्लब येथे खेळला जात आहे. या सामन्यात किवी फलंदाजांनी धुमाकूळ घातला आहे. पहिल्या डावात झिम्बाब्वेला फक्त 125 धावांवर गुंडाळल्यानंतर, दुसऱ्या दिवसअखेर न्यूझीलंडने 130 षटकांत 3 गडी गमावून 601 धावा केल्या आहेत. चौथ्या विकेटसाठी रचिन रवींद्र आणि हेन्री निकोल्स यांच्यात 250 पेक्षा जास्त धावांची भागीदारी झाली आहे आणि दोन्ही फलंदाजांनी 150 धावांचा टप्पा गाठला आहे. याआधी सलामीवीर डेव्हॉन कॉनवेने 153 धावांची शानदार खेळी केली होती.
न्यूझीलंडच्या कसोटी क्रिकेटच्या इतिहासात पहिल्यांदाच त्यांच्या तीन फलंदाजांनी एका डावात 150 धावांचा टप्पा गाठला आहे, तर जागतिक क्रिकेटमधील ही फक्त तिसरी घटना आहे. भारताने कानपूरमध्ये हा पराक्रम केला होता.
न्यूझीलंडपूर्वी भारताने 39 वर्षांपूर्वी 1986 मध्ये श्रीलंकेविरुद्ध कानपूर कसोटीत हा पराक्रम केला होता. या सामन्याच्या पहिल्या डावात श्रीलंकेला 420 धावांवर रोखल्यानंतर भारताने 676 धावा केल्या होत्या. यादरम्यान सुनील गावस्कर यांनी 176, मोहम्मद अझरुद्दीन यांनी 199 आणि कर्णधार कपिल देव यांनी 169 धावांची शानदार खेळी केली.
तर जागतिक क्रिकेटच्या इतिहासात पहिल्यांदाच, इंग्लंडने 1938 च्या ओव्हल कसोटीत ऑस्ट्रेलियाविरुद्ध हे केले होते, जेव्हा त्यांचे तीन फलंदाज लिओनार्ड हटन (364), मॉरिस लेलँड (187) आणि जो हार्डस्टाफ (169) यांनी एकाच डावात 150 धावांचा टप्पा ओलांडला होता. यादरम्यान, प्रथम फलंदाजी करणाऱ्या इंग्लंडने 903 धावांचा मोठा टप्पा गाठला आणि 7 विकेट पडल्यानंतर डाव घोषित केला.
त्यानंतर इंग्लंडने ऑस्ट्रेलियाला 201 आणि 123 धावांवर गुंडाळले आणि सामना 579 धावांच्या फरकाने जिंकला.
Comments are closed.