कॅनिंग्टन ओव्हलवर खेळल्या गेलेल्या पाचव्या आणि शेवटच्या कसोटीत टीम इंडियाने इंग्लंडला केवळ 6 धावांनी पराभूत करून ऐतिहासिक विजय मिळवला आणि मालिका 2-2 अशी बरोबरीत संपवली. मात्र, विजय मिळाल्यानंतर जे दृश्य पाहायला मिळाले, त्याने क्रिकेट चाहत्यांना आश्चर्यचकित केले. सामना जिंकल्यानंतर टीम इंडिया थेट इंग्लंडच्या ड्रेसिंग रूममध्ये पोहोचली, जिथे दोन्ही संघांचे खेळाडू एकमेकांशी मनमोकळेपणाने गप्पा मारताना दिसले.
भारतीय फलंदाज करुण नायर यांनी स्वतः ही गोष्ट उघड केली. त्यांच्या म्हणण्यानुसार, सामना संपल्यानंतर भारतीय संघाने कोणताही मोठा जल्लोष न करता थेट प्रतिस्पर्धी संघाच्या ड्रेसिंग रूममध्ये जाऊन सर्वांनी एकमेकांशी संवाद साधला. नायर यांच्या मते, “दोन्ही संघांना वाटले की ही मालिका अलीकडच्या काळातील सर्वोत्कृष्ट कसोटी मालिकांपैकी एक ठरली आहे.” तर इंग्लंडचे प्रशिक्षक ब्रेंडन मॅकलम यांनीही तिला त्यांच्या कारकिर्दीतील एक संस्मरणीय मालिका ठरवले.
लीड्समध्ये खेळल्या गेलेल्या पहिल्या कसोटीत इंग्लंडने बाजी मारली होती, पण भारताने दुसरी कसोटी जिंकून जबरदस्त पुनरागमन केले होते. तिसरा सामना इंग्लंडच्या खात्यात गेला होता. चौथा सामना अनिर्णित राहिला आणि पाचव्या सामन्यात रोमांचक पद्धतीने भारताने विजय मिळवला होता. अखेरच्या कसोटीत भारतीय गोलंदाजांनी इंग्लंडच्या फलंदाजीची पूर्णपणे धुळधाण उडवली होती.
नायरला सुरुवातीच्या तीन कसोट्यांमध्ये खेळण्याची संधी देण्यात आली होती, पण तो तिन्ही सामन्यांमध्ये मोठी खेळी करू शकला नाही. त्यामुळे त्याला चौथ्या कसोटीतून बाहेर करण्यात आले होते. ऋषभ पंतला दुखापत झाल्यामुळे त्याला पाचव्या कसोटीत पुन्हा संधी मिळाली आणि त्या सामन्यात त्याने 57 धावांची महत्त्वाची खेळी केली. त्याच्या खेळीमुळे भारताने पहिल्या डावात 224 धावा केल्या होत्या, तर प्रत्युत्तरात इंग्लंडचा संघ 247 धावांवर गारद झाला होता.
दुसऱ्या डावात भारताने 396 धावांचा भल्यामोठा डोंगर उभा केला आणि इंग्लंडपुढे 374 धावांचे लक्ष्य ठेवले. शेवटच्या दिवशी यजमान संघाला फक्त 35 धावा हव्या होत्या आणि 4 गडी शिल्लक होते, पण मोहम्मद सिराजने भेदक गोलंदाजी करत तब्बल 9 बळी घेत भारताला ऐतिहासिक विजय मिळवून दिला.
आता टीम इंडिया ऑक्टोबरमध्ये वेस्ट इंडिजविरुद्ध दोन सामन्यांची कसोटी मालिका खेळताना दिसेल.
Comments are closed.