मला घेऊन चल, नाहीतर घरातले… रात्री बॉयफ्रेंडला मेसेज; दुसऱ्या दिवशी लटकलेली बॉडी आढळली, बाबा-

गांधीनगर: बनासकांठा जिल्ह्यातील एका थरारक हत्याकांडाने संपूर्ण गुजरात हादरून गेली आहे. 18 वर्षीय एमबीबीएसची स्वप्ने पाहणारी विद्यार्थिनी चंद्रिका चौधरी हिचा खून तिच्याच वडील सेधाभाई आणि काका शिवाभाई पटेल यांनी केल्याचा आरोप पोलिसांनी केला आहे. चंद्रिकेच्या वडिलांचा शोध सुरू असून दोन्ही काकांना अटक करण्यात आली आहे, अशी माहिती सहाय्यक पोलिस अधीक्षक सुमन नाला यांनी दिली.

प्रेमसंबंधावरून वाढला तणाव

चंद्रिका आणि हरेश चौधरी हे लिव्ह-इन रिलेशनशिपमध्ये राहत होते. मात्र तिच्या कुटुंबाने या नात्याला तीव्र विरोध केला होता. कुटुंबाला तिचं अन्यत्र लग्न लावून द्यायचं होतं. याबाबत चंद्रिकेने हरेशला सांगत आपला जीव धोक्यात असल्याची भीती व्यक्त केली होती. २४ जून रोजी रात्री उशिरा तिने हरेशला इन्स्टाग्रामवर मेसेज पाठवला, “मला घेऊन चल, नाहीतर माझं कुटुंब माझ्या इच्छेविरुद्ध माझं दुसरीकडे लग्न लावून देईल. जर मी लग्नाला तयार झाले नाही, तर ते मला मारुन टाकतील. मला वाचव.”

मृत्यूचा संशय आणि न्यायालयीन लढा

मेसेजनंतर काही तासांनी चंद्रिकेचा मृतदेह तिच्या घरात आढळला. सुरुवातीला हा नैसर्गिक मृत्यू किंवा आत्महत्या असल्याचं दाखवण्याचा प्रयत्न झाला. मृत्यू प्रमाणपत्र देऊन कुटुंबाने हृदयविकाराचा झटका आल्याचा दावा केला. अगदी तिच्या अंत्यसंस्काराची घाईघाईत व्यवस्था करून नातेवाईकांनाही, त्यात पालनपूरमध्ये शिकणाऱ्या भावालाही, बोलावले नाही.

हरेशला हा प्रकार संशयास्पद वाटला. त्याने पोलिसांत तक्रार दाखल केली आणि मृत्यूची चौकशी करण्याची मागणी केली. त्यापूर्वीच, चंद्रिकाला कुटुंब ठार मारू शकतं, या भीतीने त्याने न्यायालयात याचिका दाखल केली होती, पण सुनावणीच्या तारखेआधीच तिचा मृत्यू झाला होता.

पूर्वनियोजित खूनाची पोलिस चौकशी

चौकशीत धक्कादायक माहिती समोर आली. चंद्रिकेने घरातून पळून हरेशसोबत राहण्याचा प्रयत्न केला होता, पण पोलिसांनी तिला शोधून कुटुंबाकडे सुपूर्द केलं. 24 जूनच्या रात्री तिच्या लग्नास नकार दिल्यानंतर, वडील आणि काकांनी तिचा खून करण्याचा कट रचला.

पोलिसांच्या मते, त्यांनी त्रिस्तरीय योजना आखली, तिला पहिल्यांदा दूधातून औषध देऊन तिला बेशुद्ध केलं, नंतर गळा दाबून हत्या केली, आत्महत्येसारखा आभास निर्माण करण्यासाठी मृतदेह फासावर लटकवले. रात्री काही जणांनी मृतदेह पाहिला तेव्हा आत्महत्या झाल्याचं भासवलं, तर सकाळी इतरांना हृदयविकाराच्या झटक्याने मृत्यू झाल्याचं सांगण्यात आलं.

तांत्रिक पुरावे, परिस्थितीजन्य तथ्ये आणि विरोधाभासी जबाब यांच्या आधारे हा खून पूर्वनियोजित असल्याचं पोलिसांनी निष्कर्ष काढला. थरड पोलिस ठाण्यात खुनाचा गुन्हा दाखल करून दोघा काकांना अटक करण्यात आली असून, वडिलांचा शोध सुरू आहे.

आणखी वाचा