पहिला वाढदिवस ठरला शेवटचा, केक कापला अन् 5 मिनिटात इमारत कोसळली; माय-लेकीचा मृत्यू, वडील बेपत्ता

विरारमध्ये इमारत कोसळून झालेल्या दुर्घटनेतील मृतांचा आकडा 15 वर पोहोचला आहे. गेल्या तीस तासांपासून एनडीआरएफ आणि पालिकेच्या अग्निशमन दलाकडून बचावकार्य सुरू आहे. मंगळवारी मध्यरात्रीच्या सुमारास झालेल्या दुर्घटनेतून आतापर्यंत दोन जणांना वाचवण्यात आले असून मृतांचा आकडा वाढतच चालला आहे. या इमारतीच्या ढिगाऱ्याखाली अनेक हसती खेळती कुटुंब गाडली गेली. यातीलच एक जोयल कुटुंब होते. या कुटुंबातील मुलीचा पहिला वाढदिवस शेवटचा ठरला आणि इमारत कोसळून माय-लेकीचा मृत्यू झाला.

मंगळवारी उत्कर्षां जोयल या चिमुकलीचा पहिला वाढदिवस होता. तो साजरा केल्यानंतर रात्री ही दुर्घटना घडली. त्यात चिमुकल्या उत्कर्षासोबत तिची आई आरोही जोयल (वय -24) या दोघींचा मृत्यू झाला. तर तिचे वडील ओमकार जोयल हे बेपत्ता आहेत. बचाव पथकाकडून त्यांचा शोध सुरू आहे.