आशिया कपपूर्वी टीम इंडियाचा उपकर्णधार शुभमन गिल फिटनेस टेस्टसाठी सज्ज झाला आहे. 25 वर्षीय गिलने 29 ऑगस्ट रोजी बीसीसीआयच्या सेंटर ऑफ एक्सलन्समध्ये हजेरी लावली. भारतीय संघ 4 सप्टेंबरला दुबईत एकत्र येणार असून त्याआधी सर्व खेळाडूंना फिटनेस टेस्ट पास करणे आवश्यक आहे.
वायरल तापामुळे दुलीप ट्रॉफी स्पर्धेतून माघार घ्यावी लागलेल्या गिलला आता वैद्यकीय परवानगी मिळाली आहे. तो पूर्णपणे बरा झाल्याने सरावालाही सुरुवात केली आहे. गिलला उत्तर विभागाचे नेतृत्व सोपवण्यात आले होते, परंतु तब्येत खालावल्याने तो स्पर्धेत उतरू शकला नाही. आशिया कपमध्ये तो सूर्यकुमार यादव याचा डिप्टी म्हणून काम करणार असून कदाचित अभिषेक शर्मा सोबत ओपनिंग करणार आहे.
गिलने 28 ऑगस्ट रोजी मोहालीमध्ये जिम व नेट्समध्ये सराव केला होता. मात्र, सततच्या पावसामुळे आवश्यक सुविधा उपलब्ध न झाल्याने त्याने बेंगळुरूकडे वळण्याचा निर्णय घेतला. सुरुवातीला गिल, रोहित शर्मा आणि के.एल. राहुल यांनी एकत्र फिटनेस मूल्यांकन द्यायचे ठरवले होते. मात्र, रोहितची चाचणी आता सप्टेंबरच्या मध्यावर ढकलण्यात आली आहे.
भारतीय संघ 4 सप्टेंबरला दुबईला रवाना होणार आहे. तेथून खेळाडू थेट आशिया कपची तयारी करतील. प्री-टूर्नामेंट कॅम्प आयोजित न करण्याचा निर्णय टीम मॅनेजमेंटने घेतला आहे. दुबई भारताचा तळ ठरणार असून, अबू धाबीतील सामन्यासाठी संघ त्या दिवशीच जाईल व त्याच दिवशी परत येईल. भारत 19 सप्टेंबरला ओमानशी भिडणार आहे. जर संघ सुपर-4 मध्ये प्रवेश करेल, तर पुन्हा 23 सप्टेंबरला ओमानविरुद्ध सामना होणार आहे.
एशिया कपसाठी जाहीर करण्यात आलेल्या भारतीय संघाचे नेतृत्व सूर्यकुमार यादव करणार आहे, तर उपकर्णधाराची जबाबदारी शुभमन गिल याच्याकडे सोपवण्यात आली आहे. संघात फलंदाज आणि ऑलराउंडर म्हणून अभिषेक शर्मा, तिलक वर्मा, हार्दिक पांड्या, शिवम दुबे, अक्षर पटेल आणि रिंकू सिंग यांचा समावेश आहे. यष्टिरक्षक विभागात जितेश शर्मा आणि संजू सॅमसन यांची निवड करण्यात आली आहे. गोलंदाजांच्या यादीत मात्र अनुभव आणि तरुणाईचा उत्तम संगम दिसून येतो, ज्यात जसप्रीत बुमराह, अर्शदीप सिंह, वरुण चक्रवर्ती, कुलदीप यादव आणि हर्षित राणा या खेळाडूंचा समावेश करण्यात आला आहे.
Comments are closed.