आम्ही आशिया चषक खेळणार नाही; आता पाकिस्तानची जिद्द, स्पर्धेतून माघार घेतल्यास समीकरण काय?

एशिया कप पाक वि यूएई: आशिया चषक 2025 च्या स्पर्धेत (Asia Cup 2025) उद्या म्हणजेच 17 सप्टेंबर रोजी पाकिस्तान विरुद्ध यूएईचा (Pakistan vs UAE) सामना खेळवण्यात येणार आहे. मात्र पाकिस्तान आणि यूएईचा सामना अडचणीत येण्याची शक्यता आहे. पाकिस्तानने आयसीसीकडे काही मागण्या केल्या होत्या. त्या मागण्या आयसीसीने मान्य न केल्यास उर्वरित आशिया चषक स्पर्धेत बहिष्कार टाकण्याची धमकी दिली आहे. परंतु कालच आयसीसीने पाकिस्तान क्रिकेट बोर्डाची मागणी फेटाळून लावल्याने आता पाकिस्तान संघ कोणता निर्णय घेणार, याकडे सर्वांचं लक्ष लागलं आहे.

नेमकं प्रकरण काय?

आशिया कपमध्ये भारत आणि पाकिस्तान यांच्यातील लढत 14 सप्टेंबर रोजी पार पडली. या मॅचमध्ये भारतानं पाकिस्तानचा 7 विकेटनं पराभव केला. या मॅचच्या नाणेफेकीच्या वेळी आणि मॅच संपल्यानंतर भारताच्या खेळाडूंनी पाकिस्तानच्या खेळाडूंसोबत हस्तांदोलन केलं नव्हतं. यावरुन पाकिस्तान क्रिकेट बोर्डानं आयसीसीकडे तक्रार करत सामनाधिकारी अँडी पायक्रॉफ्ट यांची हकालपट्टी करण्याची मागणी केली होती. आयसीसीनं पाकिस्तानची ही फेटाळली आहे.

पीसीबीची मागणी आयसीसीने फेटाळली-

पाकिस्तान क्रिकेट बोर्डानं आयसीसीकडे केलेली विनंती फेटाळून लावण्यात आली आहे. आयसीसीनं सामनाधिकारी अँडी पायक्रॉफ्ट यांची हकालपट्टी करण्याची मागणी फेटाळण्याचं कारण देखील दिलं आहे. खेळाडूंनी हस्तांदोलन करण्यामध्ये अँडी पायक्रॉफ्ट यांची भूमिका मोठी नव्हती, असं आयसीसीनं म्हटलं. पाकिस्तान क्रिकेट बोर्डानं अँडी पायक्रॉफ्ट यांची सामनाधिकारी पॅनेलमधून हकालपट्टी न केल्यास आशिया चषकातून माघार घेण्याची धमकी दिली होती. आयसीसीनं या धमकीला अजिबात किंमत दिलेली नाही. आयसीसीनं पाकिस्तानची मागणी फेटाळून लावली आहे.

पाकिस्तानने स्पर्धेतून माघार घेतल्यास समीकरण काय?

पाकिस्तान क्रिकेट संघ सध्या पॉइंट्स टेबलमध्ये दुसऱ्या स्थानावर आहे. पाकिस्तानने 2 पैकी 1 सामना जिंकला आहे. युएईनेही 1 सामना जिंकला आहे. काल ओमानला हरवून संघाने सुपर-4 मध्ये जाण्याच्या आशा जिवंत ठेवल्या. आता बुधवारी होणाऱ्या सामन्यातील (युएई विरुद्ध पाकिस्तान आशिया कप २०२५) विजेता सुपर-4 मध्ये पोहोचेल. पाकिस्तानने जर युएई विरुद्धच्या सामन्यात बहिष्कार टाकल्यास त्यांचेच नुकसान होईल. या परिस्थितीत युएईला 2 गुण मिळतील, त्याचे एकूण 4 गुण होतील आणि ते ग्रुप अ च्या पॉइंट्स टेबलमध्ये दुसऱ्या क्रमांकावर येईल. पाकिस्तान ग्रुप स्टेजमधूनच बाहेर पडेल आणि युएई सुपर-4 मध्ये पोहोचणारा दुसरा संघ असेल.

भारत सुपर 4 मध्ये दाखल- (Team India In Super 4)

आशिया चषकातील अ गटात भारतानं दोन्ही मॅचमध्ये विजय मिळवला आहे. यूएई आणि पाकिस्तानवर भारतानं विजय मिळवत 4 गुण मिळवले.

आशिया कपमधील उर्वरित सामन्यांचं वेळापत्रक-

16 सप्टेंबर – बांगलादेश विरुद्ध अफगाणिस्तान
17 सप्टेंबर – पाकिस्तान विरुद्ध यूएई
18 सप्टेंबर – श्रीलंका विरुद्ध अफगाणिस्तान
19 सप्टेंबर – भारत विरुद्ध ओमान

सुपर-4 आणि अंतिम सामना-

20 सप्टेंबर – बी1 विरुद्ध बी2
21 सप्टेंबर – ए1 विरुद्ध ए2
23 सप्टेंबर – ए2 विरुद्ध बी1
24 सप्टेंबर – ए1 विरुद्ध बी2
25 सप्टेंबर – ए2 विरुद्ध बी2
26 सप्टेंबर – ए1 विरुद्ध बी1
28 सप्टेंबर – अंतिम सामना

संबंधित बातमी:

Ind vs Pak Asia Cup 2025: फायनल जिंकूनही ट्रॉफी घेणार नाही…; हस्तांदोलन टाळल्यानंतर सूर्यकुमार यादवने आता कोणती डिमांड ठेवली?

आणखी वाचा