‘सध्या देशभरात लाखो मुले बॅडमिंटन खेळत आहेत. त्यातून पुढे येणे नक्कीच सोपे काम नाही. त्यामुळे कोर्टवर खेळताना संयम राखणे शिकायला हवे. तुमच्या मेहनतीला नक्की फळ मिळेल,’ असे मत हिंदुस्थानचा स्टार बॅडमिंटनपटू एच. एस. प्रणॉय याने व्यक्त केले. रोटरी व रामा ग्रुप पुरस्कृत जिल्हास्तरीय सुपर 100 मानांकन बॅडमिंटन स्पर्धेच्या पारितोषिक वितरणाप्रसंगी 33 वर्षीय प्रणॉय पुण्यात आला होता. एसीई अरेना स्पोर्ट्स लॅण्ड आहेरनगर, वाल्हेकरवाडी, चिंचवड व ग्रॅव्हिटी पुनावळे येथे ही स्पर्धा झाली. यावेळी बोलताना जागतिक क्रमवारीत तिसऱ्या क्रमांकावर असलेला प्रणॉय म्हणाला, ‘बॅडमिंटन हा वेगवान खेळ आहे. तुम्हाला पूर्ण वर्षभराच्या स्पर्धांचे नियोजन करता यायला हवे.
यात सातत्य राखणे आणि दीर्घकाळ खेळत राहणे सोपे नाही. त्याचबरोबर हा महागडा खेळ आहे. त्याला आर्थिक नियोजनाचीही जोड द्यावी लागते. तेव्हा रोटरीसारख्या संस्थेचे कौतुक आहे. चांगल्या मुलांचा शोध घेऊन त्यांना आंतरराष्ट्रीय स्पर्धेपर्यंत पोहोचण्यासाठी मदत करणे गरजेचे आहे. देशभरातून असा पाठिंबा खेळाडूंना मिळायला हवा. कारण गुणवान खेळाडूंची आपल्याकडे कमतरता नाही. रोटरीसारख्या संस्थांनी खेळाडूंच्या मदतीसाठी पुढे यायला हवे. जेणेकरून भविष्यात ऑलिम्पिक, जागतिक स्पर्धेसाठी आपल्याला चांगले खेळाडू मिळतील.’ यानंतर त्याने खेळाडूंना आपल्या सहीचे शटलही दिले. त्यामुळे खेळाडूंचा आनंद गगनात मावला नाही. त्याने थोडा वेळ खेळाडूंसोबत खेळण्याचा आनंदही लुटला.
लक्ष्य सेन आणि प्रणॉयमध्ये मागील काही काळात चांगल्या लढती रंगल्या. प्रणॉयने सेनचेही कौतुक केले. आयुष शेट्टीसारखे खेळाडू असल्याने हिंदुस्थानचे भविष्य उज्ज्वल आहे, असेही तो म्हणाला. मागील काही महिन्यांपासून कामगिरीत सातत्य राखता आले नाही, याची कबुलीही प्रणॉयने दिली. मात्र वयाच्या तिशीनंतर पूर्वीसारखा खेळ करणे शक्य होत नाही. नक्कीच मर्यादा येतात, मात्र त्यावर मात करण्याचा खेळाडूंचा प्रयत्न असतो. खेळाडूसाठी दीर्घ कारकीर्दीत दुखापत न होता खेळणे सोपे नसते, असे सांगायलाही तो विसरला नाही. निवृत्तीचा विचार नसून आणखी काही वर्षे खेळणार असल्याचे त्याने स्पष्ट केले.
Comments are closed.