टीम इंडियाला अनेक आयसीसी स्पर्धा जिंकवून देणारे दिग्गज युवराज सिंह निवृत्तीनंतर तरुण खेळाडूंवर काम करत आहेत. विशेषत: पंजाबच्या तरुण खेळाडूंना घडवण्यासाठी युवराज पूर्ण ताकदीनिशी प्रयत्न करत आहेत. याचाच परिणाम म्हणून आज शुबमन गिल तिन्ही फॉरमॅटमध्ये लीडरशिप ग्रुपचा भाग बनला आहे. तसेच अभिषेक शर्मा देखील अवघ्या एका वर्षात टीम इंडियाचा सुपरस्टार ठरला आहे. आता आणखी दोन तरुण खेळाडूंना ‘सिक्सर किंग’ स्वतः सराव घडवत आहेत.
निवृत्तीनंतर युवराज सिंह यांनी टीम इंडियासाठी भविष्यातील स्टार्स तयार करण्याची जबाबदारी घेतली. युवीने शुबमन गिल आणि अभिषेक शर्मासोबत मेहनत करण्यास सुरुवात केली. त्यानंतर शुबमन गिलला भारतीय संघात स्थान मिळाले. आजच्या घडीला गिल भारताचा कसोटी कर्णधार आहे, तसेच तो वनडे आणि टी20 फॉरमॅटमध्ये उपकर्णधाराची भूमिकाही निभावत आहे. अभिषेक शर्मा देखील आता टी20 फॉरमॅटमधला सर्वात मोठा हिरो ठरला आहे आणि लवकरच त्याला वनडे संघातही संधी मिळण्याची शक्यता आहे. या दोन्ही खेळाडूंनंतर आता दिल्लीचा प्रियांश आर्या आणि पंजाबचा प्रभसिमरन सिंह युवराज सिंह यांच्यासोबत सराव करताना दिसत आहेत. दोन्ही खेळाडूंनी आयपीएलमध्ये जबरदस्त कामगिरी केली आहे.
आयपीएलमध्ये प्रियांश आर्या आणि प्रभसिमरन सिंह हे पंजाब किंग्ससाठी सलामी फलंदाजी करतात. आयपीएल 2025 मध्ये या दोन्ही तरुण खेळाडूंनी चांगली कामगिरी केली होती. आता युवराज सिंहचा साथ मिळाल्याने त्यांच्या फलंदाजीत आणखी सुधारणा होणार आहे. हे दोघेही खेळाडू सैयद मुश्ताक अली ट्रॉफी आणि आयपीएल 2026 मध्ये जबरदस्त कामगिरी करून टीम इंडियामध्ये स्थान मिळवण्यासाठी आपला दावा मजबूत करू शकतात. याशिवाय हे दोन्ही तरुण खेळाडू वनडे आणि कसोटी संघातही जागा मिळवण्यावर लक्ष केंद्रित करतील.
Comments are closed.