रोहित आफ्रिदीचा विक्रम मोडण्याच्या जवळ, एकदिवसीय सामन्यात सर्वाधिक षटकार मारण्यासाठी आता फक्त इतके 'षटकार' दूर

दिल्ली: भारतीय संघाचा अनुभवी सलामीवीर रोहित शर्मा कर्णधारपद सोडल्यानंतर प्रथमच फलंदाज म्हणून मैदानात उतरणार आहे. भारत आणि ऑस्ट्रेलिया यांच्यातील तीन एकदिवसीय सामन्यांच्या मालिकेतील पहिला सामना रविवारी होणार आहे.

आफ्रिदीचा विक्रम मोडण्यापासून 'हिटमॅन' फक्त 8 षटकार दूर

या मालिकेत रोहित शर्माकडे पाकिस्तानचा माजी कर्णधार शाहिद आफ्रिदीचा वनडेमध्ये सर्वाधिक षटकार मारण्याचा विश्वविक्रम मोडण्याची मोठी संधी आहे. आफ्रिदीने आपल्या कारकिर्दीत 398 सामन्यात 351 षटकार मारले आहेत. तर रोहित शर्माने आतापर्यंत २७३ वनडे सामन्यांमध्ये ३४४ षटकार मारले आहेत. म्हणजेच आफ्रिदीचा विक्रम मोडण्यापासून तो केवळ 8 षटकार दूर आहे.

एकदिवसीय आंतरराष्ट्रीय क्रिकेटमध्ये सर्वाधिक षटकार मारणाऱ्या टॉप-5 खेळाडूंची यादी

• शाहिद आफ्रिदी (पाकिस्तान) – ३९८ सामने, ३५१ षटकार
• रोहित शर्मा (भारत) – २७३ सामने, ३४४ षटकार
• ख्रिस गेल (वेस्ट इंडिज) – 301 सामने, 331 षटकार
• सनथ जयसूर्या (श्रीलंका) – ४४५ सामने, २७० षटकार
• एमएस धोनी (भारत) – 350 सामने, 229 षटकार

रोहित फक्त वनडे फॉरमॅटमध्येच दिसणार आहे

रोहित शर्माने नुकतीच टी-20 आणि कसोटी क्रिकेटमधून निवृत्ती जाहीर केली होती. आता तो केवळ वनडे फॉरमॅटमध्येच भारताचे प्रतिनिधित्व करेल. रोहितच्या नेतृत्वाखाली भारताने २०२३ च्या एकदिवसीय विश्वचषकाच्या अंतिम फेरीपर्यंतचा प्रवास केला होता. त्याच्या नेतृत्वाखाली संघाने सलग 10 सामने जिंकले, मात्र विजेतेपदाच्या लढतीत ऑस्ट्रेलियाकडून पराभव पत्करावा लागला. मात्र, यानंतर रोहित शर्माने चॅम्पियन्स ट्रॉफी जिंकून भारताचा 12 वर्षे जुना विजेतेपदाचा दुष्काळ संपवला.

ऑस्ट्रेलियाविरुद्धचा विक्रम मोडणार का?

आता 'हिटमॅन' रोहित शर्मा ऑस्ट्रेलियाविरुद्धच्या या मालिकेत शाहिद आफ्रिदीचा विश्वविक्रम मोडून एकदिवसीय क्रिकेटमध्ये सर्वाधिक षटकार ठोकणारा फलंदाज बनणार का याकडे सर्वांचे लक्ष लागले आहे.

संबंधित बातम्या