भारत-अ आणि दक्षिण आफ्रिका-अ यांच्यातील दुसरा अनधिकृत कसोटी सामना बंगळुरूमध्ये सुरू असून तिसऱ्या दिवशीचा खेळ एक अनपेक्षित घटना घडल्याने चर्चेत आला आहे. भारतीय संघाचा कर्णधार आणि मुख्य विकेटकीपर-फलंदाज रिषभ पंत पुन्हा एकदा दुखापतीला बळी पडला आहे. इंग्लंडविरुद्धच्या मालिकेत झालेल्या गंभीर अपघातानंतर दीर्घ पुनर्वसनातून बाहेर पडून मैदानावर पुनरागमन करणाऱ्या पंतसाठी हा धक्का मोठा मानला जात आहे.
तिसऱ्या दिवशी भारत-अ चा डाव काहीसा डगमगत असताना पंतने क्रीजवर पाऊल ठेवले. नेहमीप्रमाणेच त्याने आक्रमक फलंदाजीची पद्धत स्वीकारली. जलद धावा काढण्याच्या हेतूने त्याने काही आकर्षक फटकेही खेळले. मात्र दक्षिण आफ्रिका-अ चा वेगवान गोलंदाज त्सेपो मोरकीने बाउन्सरचा मारा सुरू केला आणि त्याच दरम्यान सलग तीन चेंडूंवर पंतला तीन वेगवेगळ्या ठिकाणी दुखापती झाल्या. पहिला चेंडू थेट हेल्मेटवर आदळला. पंत काही क्षण सावरला आणि खेळ सुरू ठेवला. दुसरा चेंडू डाव्या कोपरावर लागला, तरीही पंत मागे हटला नाही. परंतु तिसरा चेंडू थेट पोटावर बसताच पंत वेदनांनी तडफडू लागला आणि ताबडतोब फिजिओला मैदानात बोलावण्यात आले.
वैद्यकीय तपासणीनंतर पंतने खेळ पुढे न खेळता रिटायर्ड हर्ट होण्याचा निर्णय घेतला. तो त्या वेळी 22 चेंडूंमध्ये 2 चौकार आणि 1 षटकारांच्या मदतीने 17 धावांवर खेळत होता. त्याच्या चेहऱ्यावर वेदना स्पष्टपणे दिसत होत्या आणि पॅव्हेलियनकडे जाताना त्याचा चेहरा चिंताग्रस्त दिसून आला.
पंतच्या दुखापतीची तीव्रता अद्याप स्पष्ट झालेली नाही. मात्र भारतीय संघांसाठी ही चिंता वाढवणारी बातमी आहे. कारण भारत आणि दक्षिण आफ्रिका यांच्यातील मुख्य आंतरराष्ट्रीय मालिका 14 नोव्हेंबरपासून सुरू होत आहे. या मालिकेत 2 कसोटी, 3 एकदिवसीय आणि 5 T20 सामने खेळले जाणार आहेत. या मालिकेसाठी पंत हा महत्त्वाचा खेळाडू मानला जात आहे. त्याच्या अनुपस्थितीने टीम इंडियाच्या समतोलावर परिणाम होण्याची शक्यता व्यक्त केली जात आहे.
Comments are closed.