मुंबईला मिळणार का हिटमॅनचा साथ? रोहित शर्माच्या खेळण्यावर प्रश्नचिन्ह कायम

भारताचा माजी कर्णधार रोहित शर्माने आगामी विजय हजारे ट्रॉफीमध्ये सहभागी होणार की नाही हे अद्याप मुंबई क्रिकेट असोसिएशन (एमसीए) ला कळवलेले नाही. ही स्पर्धा 25 डिसेंबर ते 18 जानेवारी दरम्यान अहमदाबाद, राजकोट, जयपूर आणि बेंगळुरू येथे खेळवली जाईल आणि नॉकआउट सामने बेंगळुरू येथील सेंटर ऑफ एक्सलन्स येथे होतील.

एमसीएच्या एका वरिष्ठ अधिकाऱ्याने सांगितले की रोहित शर्माकडून कोणताही अधिकृत संदेश मिळालेला नाही. पीटीआयच्या वृत्तानुसार, तो म्हणाला, “माझ्या माहितीनुसार, आम्हाला त्याच्या उपलब्धतेबद्दल कोणतीही माहिती मिळालेली नाही.” दरम्यान, बीसीसीआयच्या अधिकाऱ्यांचे म्हणणे आहे की राष्ट्रीय निवडीसाठी विचारात घेतलेल्या खेळाडूंसाठी देशांतर्गत स्पर्धांमध्ये सहभाग घेणे अत्यंत महत्त्वाचे आहे.

रोहित शर्माने अलीकडेच कसोटी आणि टी20 आंतरराष्ट्रीय क्रिकेटमधून निवृत्ती घेतली आहे. आता त्याने आपले लक्ष एकदिवसीय क्रिकेटवर केंद्रित केले आहे. ऑस्ट्रेलियाविरुद्धच्या अलिकडच्या एकदिवसीय मालिकेत रोहित उत्कृष्ट फॉर्ममध्ये होता. दुसऱ्या सामन्यात त्याने 73 धावा केल्या, तर तिसऱ्या आणि शेवटच्या एकदिवसीय सामन्यात नाबाद 121 धावांनी त्याला मालिकावीराचा पुरस्कार मिळवून दिला. भारताने मालिका 1-2 अशी गमावली असली तरी रोहितची कामगिरी प्रभावी होती.

37 वर्षीय सलामीवीर सध्या मुंबईतील वांद्रे-कुर्ला कॉम्प्लेक्स (बीकेसी) येथील एमसीए अकादमीमध्ये नियमितपणे सराव करत आहे. तरुण सलामीवीर यशस्वी जयस्वालनेही त्याच्यासोबत काही सत्रांसाठी नेटमध्ये सराव केला, त्यानंतर तो दक्षिण आफ्रिकेविरुद्धच्या कसोटी मालिकेसाठी कोलकात्याला रवाना झाला.

आता रोहित शर्मा आणि विराट कोहली दोघांनीही कसोटी आणि टी-20 स्वरूपातून निवृत्ती घेतली आहे, त्यामुळे हे दोन्ही वरिष्ठ खेळाडू भारताच्या एकदिवसीय संघाचा कणा आहेत. 30 नोव्हेंबरपासून रांचीमध्ये सुरू होणाऱ्या दक्षिण आफ्रिकेविरुद्धच्या एकदिवसीय मालिकेसाठी ते परतण्याची अपेक्षा आहे. दुसरा सामना 3 डिसेंबर रोजी रायपूरमध्ये आणि तिसरा सामना 6 डिसेंबर रोजी विशाखापट्टणममध्ये खेळला जाईल. विजय हजारे ट्रॉफीमध्ये रोहित शर्मा मुंबईचे प्रतिनिधित्व करतो की नाही हे पाहणे मनोरंजक असेल.