अमेरिकी सरकारचा 800 पानांचा धक्कादायक अहवाल, पहलगाम हल्ला बंडखोरांचा दहशतवाद्यांचा नव्हे, ऑपरेशन सिंदूरमध्ये पाकिस्तानची सरशी…

‘पहलगाममधील पर्यटकांवर झालेला हल्ला हा दहशतवादी हल्ला नव्हता, तर तो बंडखोरांनी केलेला हल्ला होता व त्यानंतर हिंदुस्थानने राबवलेल्या ‘ऑपरेशन सिंदूर’मध्ये पाकिस्तानची सरशी झाली,’ असा दावा अमेरिकी सरकारच्या अहवालात करण्यात आला आहे.

यूएस-चायना इकॉनॉमिक अॅण्ड सिक्युरिटी रिह्यू कमिशन (यूएससीसी) ने हा 800 पानी अहवाल अमेरिकी काँग्रेसकडे सादर केला आहे. अमेरिका व चीनच्या आर्थिक व संरक्षणविषयक बाबींचा आढावा घेऊन अमेरिकेच्या संसदेला सल्ला देण्याचे काम हा आयोग करतो. त्यामुळे हा अहवाल अत्यंत महत्त्वाचा आहे. एप्रिल महिन्यात पहलगाममध्ये 26 निष्पाप पर्यटकांचे बळी घेणारा हल्ला हा दहशतवाद्यांनी केला नव्हता, तर तो देशांतर्गत बंडखोरांनी केलेला होता, असे अहवालात म्हटले आहे.

राफेल विरुद्ध फेक नरेटिव्ह

‘ऑपरेशन सिंदूर’नंतर चीनने अपप्रचाराची राळ उडवून दिली. फ्रान्सच्या राफेल विमानांपेक्षा आपली जे-35 ही लढाऊ विमाने कशी चांगली आहेत हे जगाला सांगण्याचा प्रयत्न केला. पाकिस्तानने चिनी शस्त्रे वापरून हिंदुस्थानचे फायटर जेट्स कसे उद्ध्वस्त केले हे पटवून देण्यासाठी चीनने ‘एआय’चा वापर करून विमानांचे ढिगारे दाखवले.

केंद्राच्या प्रचारावर प्रश्नचिन्ह

हिंदुस्थानने पाकिस्तानला धडा शिकवला असा दावा केंद्र सरकार व अधिकाऱयांकडून केला गेला. ‘ऑपरेशन सिंदूर’मध्ये हिंदुस्थानने आपली ताकद दाखवली आणि पाकिस्तानला काही तासांत गुडघ्यावर आणले, असे खुद्द पंतप्रधान मोदी म्हणाले होते. त्यावर प्रश्नचिन्ह निर्माण झाले आहे.

काँग्रेसचा सरकारवर हल्ला

‘अमेरिकी आयोगाचा अहवाल हा आपल्या कूटनीतीला आणखी एक मोठा झटका आहे. आपले पंतप्रधान व परराष्ट्र मंत्रालय या अहवालावर आक्षेप कधी घेणार? या अहवालाचा निषेध कधी नोंदवणार, असा सवाल काँग्रेस नेते जयराम रमेश यांनी ‘एक्स’ पोस्टद्वारे केला.

चीनने डाव साधला!

हिंदुस्थान-पाकिस्तानमध्ये झालेल्या छोटेखानी युद्धाचा चीन या धूर्त शेजारी देशाने मोठा फायदा उचलला. या युद्धात चीनने पाकिस्तानला सर्व प्रकारची मदत केली. पाकिस्तानने प्रथमच हे संपूर्ण युद्ध चिनी शस्त्रांच्या मदतीने लढले. चिनी लढाऊ विमानांचा वापर केला. याद्वारे चीनने लष्करी क्षमतेची एकप्रकारे चाचणी करून घेतली, असे अहवालात म्हटले आहे.