कसोटी मालिकेत झालेल्या पराभवानंतर टीम इंडिया आता दक्षिण आफ्रिकेविरुद्धच्या वनडे मालिकेकडे पूर्ण तयारीने सज्ज झाली आहे. कर्णधार केएल राहुलच्या नेतृत्वाखालील भारतीय संघ तीन सामन्यांच्या मालिकेतील पहिल्या सामन्यासाठी रांचीत दाखल झाला आहे. हा सामना रविवारी (30 नोव्हेंबर) झारखंड क्रिकेट असोसिएशन स्टेडियममध्ये खेळला जाणार आहे. मागील वनडे मालिकेत ऑस्ट्रेलियाने भारताचा 2-1 असा पराभव केला होता.
कर्णधार शुबमन गिल आणि उपकर्णधार श्रेयस अय्यर दुखापतीमुळे मालिकेबाहेर पडल्यानंतर केएल राहुलकडे संघाची कमान सोपवण्यात आली आहे. राहुल तब्बल एका महिन्यानंतर पुन्हा रोहित शर्मा आणि विराट कोहलीसोबत खेळताना दिसणार आहे. सेलेक्टर्सनी या मालिकेसाठी रिषभ पंत, ऋतुराज गायकवाड, रवींद्र जडेजा आणि तिलक वर्मा यांनाही संघात स्थान दिले आहे.
स्टार वेगवान गोलंदाज जसप्रीत बुमराह आणि मोहम्मद सिराज यांना विश्रांती देण्यात आली आहे. दुसरीकडे दक्षिण आफ्रिकेच्या संघाला कगिसो रबाडाच्या दुखापतीचा मोठा फटका बसला आहे. रबाडा बाहेर गेल्याने मार्को जेन्सन आणि नांंद्रे बर्गर या दोन युवा गोलंदाजांवर अधिक जबाबदारी येणार आहे.
पहिला वनडे सामना रविवारी दुपारी 1:30 वाजता सुरू होईल. सामन्यापूर्वीचा टॉस दुपारी 1:00 वाजता होणार आहे. रांचीतील खेळपट्टी आणि परिस्थिती लक्षात घेता दोन्ही संघ जिंकण्यासाठी जोरदार प्रयत्न करतील अशी अपेक्षा आहे.
सामन्याचा थेट प्रसारण स्टार स्पोर्ट्स नेटवर्कवर उपलब्ध असेल. तर लाईव्ह स्ट्रीमिंग जिओ सिनेमा आणि हॉटस्टार अॅप तसेच वेबसाइटवर पाहता येणार आहे. टीम इंडियासाठी ही मालिका आत्मविश्वास परत मिळवण्याची संधी असेल, तर नवोदित खेळाडूंना आपली छाप पाडण्याचीही हीच योग्य वेळ असणार आहे.
Comments are closed.