Mokshada Ekadashi : मोक्षदा एकादशीचे व्रत केल्याने मोक्ष मिळतो का?

मार्गशीर्ष महिन्यातील शुक्ल पक्षातील एकादशी तिथीला ‘मोक्षदा एकादशी’ म्हणतात. यंदा ही एकादशीची तिथी 1 डिसेंबरला असणार आहे. या दिवशी भगवान विष्णूची पूजा करतात. असे सांगितले जाते की, एकादशीला भगवान विष्णूची पूजा केल्याने सर्व मनोकामना पूर्ण होतात. तसेच आपल्याला मोक्ष मिळतो असे पुराणात म्हटले आहे. जाणून घेऊयात संपूर्ण माहिती

तारीख –

2025 मध्ये एकादशी तिथी 30 नोव्हेंबर रोजी रात्री 9 वाजून 29 मिनिटांनी सुरू होईल आणि 1 डिसेंबर रोजी सोमवारी संध्याकाळी 7 वाजून 01 मिनिटांनी संपेल त्यामुळे उदयतिथीनुसार 1 डिसेंबर रोजी मोक्षदा एकादशी साजरी होईल.

व्रत केल्याने खरंच मोक्ष मिळतो?

पौराणिक कथेनुसार, मोक्षदा एकादशीच्या दिवशी कुरुक्षेत्राच्या युद्धात लाखो योद्ध्यांना वीरगती प्राप्त होऊन त्यांना मोक्षप्राप्ती झाली. असे सांगितले जाते की, हे व्रत केल्याने मोक्ष मिळत नाही तर पुण्य प्राप्त होते. व्यक्तीला पापांपासून मुक्ती मिळते आणि जीवनात सुख-शांती येते. या दिवशी गीता पठण केल्याने आणि त्यातील शिकवणीचे पालन केल्याने मोक्षप्राप्ती होते असे म्हणतात. भगवान श्रीकृष्णामुळे हजारो लोकांना ज्ञान प्राप्त झाले. ज्ञान प्राप्त करणे म्हणजे मोक्षाचा मार्ग पाहणे आणि त्यावर चालणे.

हेही वाचा – Datta Jayanti 2025 : श्री दत्त परिक्रमा म्हणजे काय आणि ती कशी पूर्ण करतात?