पुणे महानगरपालिकसाठीच्या प्रारूप मतदार याद्यांवर ६ हजार हरकती; निवडणूक विभागाची होणार दमछाक

पुणे महापालिकेच्या आगामी निवडणुकांसाठी प्रसिद्ध झालेल्या प्रारूप मतदार यादीने अक्षरशः गोंधळ माजवल्यानंतर वाढत्या नाराजीची दखल घेत राज्य निवडणूक आयोगाने हरकती दाखल करण्याची मुदत ३ डिसेंबरपर्यंत वाढवली. त्यानुसार महापालिकेच्या १५ क्षेत्रीय कार्यालयांत शनिवारपर्यंत तब्बल ६ हजार ८३१ हरकतींचा ढीग जमा झाला आहे. पुढील काही दिवसांत हा आकडा आणखी फुगणार, हे निश्चित. त्यामुळे निवडणूक विभागाची दमछाक होणार, हेही तितकंच स्पष्ट झाले आहे.

४१ प्रभागांसाठी तयार केलेल्या प्रारूप मतदार यादीतील चुकांचा पंचनामा होत असताना, प्रशासन आता स्वतः यादी तपासत धावपळ करत आहे. मतदारांची नावे इतर प्रभागांत, काहींची नावे तर दुसऱ्याच विधानसभा-लोकसभेच्या यादीत, तर अनेकांची नावे दुबार, या सगळ्या गोंधळामुळे नागरिक आणि कार्यकर्त्यांनी महापालिकेच्या कार्यालयांवर धाव घेऊन तक्रारींचा भडीमार सुरू केला आहे. याद्यांमध्ये एवढ्या प्रमाणावर गडबड कशी झाली, याबाबत नागरिकांमध्ये संताप उसळला आहे. सिंहगड रोड क्षेत्रीय कार्यालयावर सर्वाधिक ३ हजार ८३१ हरकती आल्या असून, इतर कार्यालयांच्याही टेबलावर आक्षेपांचे ढिगारे जमा झाले आहेत.

हरकतींसाठीची मुदत ३ डिसेंबरपर्यंत वाढवण्यात आली असून, अंतिम मतदार यादी जाहीर करण्याची तारीखही पुढे ढकलली गेली आहे. मतदान केंद्रांची यादी १५ डिसेंबरला आणि मतदान केंद्रनिहाय यादी २२ डिसेंबरला जाहीर होणार आहे.

मतदार याद्यांतून पालिकेला १६ लाख ६६ हजारांची कमाई
दरम्यान, प्रारूप मतदार यादी विक्रीतून महापालिकेला १६ लाख ६६ हजार ९०६ रुपयांचे उत्पन्न मिळाले आहे. इच्छुक उमेदवारांनी आपापल्या प्रभागातील नावे तपासण्यासाठी या याद्यांवर तुटून पडल्याचे चित्र आहे.