रांची वनडे सामन्यात किंग कोहलीची जोरदार कामगिरी! सचिन तेंडुलकरचा रेकॉर्ड मोडत रचला इतिहास

दक्षिण आफ्रिकेविरुद्धच्या पहिल्या वनडे सामन्यात विराट कोहलीने (Virat Kohli) जबरदस्त खेळ केला. रांचीमध्ये विराटने 120 चेंडूत 135 धावांची विक्रमी खेळी खेळली. या डावात कोहलीने 11 चौकार आणि 7 षटकार झळकावले . विराटने पुरुष वनडे क्रिकेटच्या इतिहासातील 7000वा शतक ठोकलं. यासोबतच त्याने सचिन तेंडुलकरचा एक मोठा विक्रमही मोडला.

दक्षिण आफ्रिकेविरुद्ध विराटने 102 चेंडूत आपले शतक पूर्ण केले. शतकासाठी त्याने 7 चौकार आणि 5 षटकार मारले. आंतरराष्ट्रीय क्रिकेटमध्ये विराटचे हे 83वे शतक आहे. दमदार खेळ करत विराटने आपल्या वनडे कारकिर्दीत 52व्यांदा 100 धावांचा टप्पा ओलांडला आहे.

आता विराट कोहली भारतीय मैदानांवर सर्वाधिक शतके करणारा फलंदाज ठरला आहे. त्याने या बाबतीत सचिन तेंडुलकरचा विक्रम मोडला (Virat Kohli break sachin tendulkar’s record). रांचीमध्ये विराटने फक्त पाच डावांमध्ये 3 शतके ठोकली आहेत. तर सचिनने वडोदरा येथे सात डावांत 3 शतके केली होती. विशाखापट्टणममध्येही विराटने सात डावांत 3 शतके केली आहेत. पुण्यात त्याने आठ डावांत 3 शतके ठोकली आहेत. दक्षिण आफ्रिकेविरुद्ध रांचीमध्ये कोहलीने 7 षटकार लगावले. वनडे क्रिकेटमध्ये विराटने एका सामन्यात दुसऱ्यांदा 7 षटकार मारले आहेत. याआधी 2013 मध्ये जयपूरमध्ये ऑस्ट्रेलियाविरुद्ध त्याने 7 षटकार ठोकले होते. त्या वेळी विराटने 52 चेंडूत नाबाद 100 धावा केल्या होत्या.

भारताने प्रथम फलंदाजी करत 349 धावा केल्या. रांचीमध्ये होत असलेल्या या सामन्यात विराट कोहली (135 धावा) सोबत रोहित शर्मा आणि केएल राहुल यांनीही अर्धशतके झळकावली. राहुल या मालिकेत भारताचा कर्णधार आहे. रोहितने 51 चेंडूत 57 धावा केल्या, तर राहुलने 56 चेंडूत 60 धावा केल्या. शेवटी रवींद्र जडेजाने 20 चेंडूत धडाकेबाज 32 धावा करत भारताला मोठी धावसंख्या गाठून दिली.