IND vs SA: विराटच्या धमाकेदार शतकी खेळीवर गौतम गंभीरची रिऍक्शन व्हायरल! चाहत्यांची जिंकली मने

विराट कोहलीने (Virat Kohli) रांची येथील वनडे सामन्यात जबरदस्त फलंदाजी करत धडाकेबाज शतक ठोकले. आपल्या या खेळीत कोहलीने पहिल्याच चेंडूवर सुंदर शॉट मारत दमदार सुरुवात केली. कोहलीच्या या तुफानी खेळीमुळेच टीम इंडियाने फलंदाजीत उत्कृष्ट कामगिरी केली. कोहलीने शतक केल्यानंतर सर्वांची नजर टीम इंडियाचे मुख्य प्रशिक्षक गौतम गंभीर (Head Coach of team india Gautam Gambhir) यांच्याकडे लागली होती. गंभीर यांचं रिएक्शन पाहून सोशल मीडियावर याबाबत खूप चर्चा सुरू आहे.

रांची वनडे सामन्यात उत्कृष्ट खेळ करत विराट कोहलीने वनडे करिअरमधील आपले 52वे आणि आंतरराष्ट्रीय क्रिकेटमधील 83वे शतक पूर्ण केले. कोहलीचे शतक जसेच पूर्ण झाले, तसेच कॅमेऱ्याचे लक्ष थेट मुख्य प्रशिक्षक गौतम गंभीर यांच्याकडे वळले.

गंभीर त्या वेळी टाळ्या वाजवत कोहलीचे कौतुक करताना दिसले. मात्र, कोहली बाद होऊन पॅव्हेलियनकडे परत येत असताना गंभीर खास त्याच्या जवळ गेले आणि त्याला मिठी मारली. कोहली आणि गंभीर एकमेकांना मिठी मारतानाचा फोटो सोशल मीडियावर झपाट्याने व्हायरल होत आहे. कोहली आणि गंभीर यांचे संबंध काहीसे गोड-नसल्याचे मानले जाते, त्यामुळेच ड्रेसिंग रूममध्येही या दोघांकडे चाहत्यांचे विशेष लक्ष असते.

किंग कोहलीने या खेळीत 120 चेंडूत 135 धावा ठोकल्या. यात 11 चौकार आणि 7 भव्य षटकारांचा समावेश होता. 112.50 च्या स्ट्राइक रेटने खेळलेल्या या इनिंगमुळेच टीम इंडिया 349 धावांचा डोंगर उभारू शकली. याआधीच्या वनडे सामन्यातही कोहलीने जोरदार अर्धशतक झळकावले होते. आता उरलेल्या दोन्ही वनडे सामन्यांतही अशीच कामगिरी करून सर्व टीकाकारांची टीका पूर्णपणे शांत करण्याचा कोहलीचा प्रयत्न असेल.