निवडणूक आयोगाकडून सुधारित वेळापत्रक जाहीर
वृत्तसंस्था/ नवी दिल्ली
निवडणूक आयोगाने 12 राज्ये आणि केंद्रशासित प्रदेशांमध्ये सुरू असलेल्या विशेष सखोल पडताळणी (एसआयआर) प्रक्रियेची अंतिम मुदत 7 दिवसांनी वाढवली आहे. निवडणूक आयोगाने आपला मागील आदेश रद्द करत एक नवीन वेळापत्रक जारी केले आहे. यानुसार, गणना आणि बूथ पुनर्रचनापासून ते मसुदा यादी प्रकाशित करणे आणि दावे-हरकती प्रक्रियांपर्यंत सर्व प्रक्रिया आता सुधारित तारखांनुसार केल्या जातील. ही मुदतवाढ ज्या राज्यांमध्ये आणि केंद्रशासित प्रदेशांमध्ये एसआयआर आधीच सुरू होता त्यांना लागू करण्यात आली आहे. त्यानुसार अंदमान आणि निकोबार बेटे, छत्तीसगड, गोवा, गुजरात, केरळ, लक्षद्वीप, मध्य प्रदेश, पुद्दुचेरी, राजस्थान, तामिळनाडू, उत्तर प्रदेश आणि पश्चिम बंगाल यांचा समावेश आहे.
निवडणूक आयोगाने जारी केलेल्या सुधारित वेळापत्रकामुळे मतदारांना आपल्या नावाची पडताळणी करण्यासाठी अधिक वेळ मिळणार आहे. मतदारयादीत नावे जोडू इच्छिणाऱ्या, वगळू इच्छिणाऱ्या किंवा दुरुस्त करू इच्छिणाऱ्यांना या निर्णयामुळे दिलासा मिळणार आहे. प्राथमिक टप्प्यातील अंतिम मुदत 4 डिसेंबरऐवजी 11 डिसेंबर करण्यात आली आहे. बीएलओ आणि ईआरओ स्तरावर फील्ड पडताळणी आणि सुनावणीसाठीचा वेळही वाढविण्यात आला आहे.
अंतिम मतदार यादी अधिक अचूकतेने तयार करणे हे निवडणूक आयोगाचे ध्येय आहे. आयोगाच्या मते, मतदार यादी अधिक अचूक, अद्ययावत आणि सुव्यवस्थित करण्यासाठी ही मुदतवाढ आवश्यक होती. पूर्वी, एसआयआर प्रक्रिया पूर्ण करण्याची अंतिम तारीख 4 डिसेंबर होती, म्हणजेच फक्त चार दिवस उरले होते. आता, सात दिवसांच्या मुदतवाढीमुळे, ही मुदत 11 डिसेंबरपर्यंत वाढविण्यात आली आहे.
निवडणूक आयोगाने जाहीर केलेले नवीन एसआयआर वेळापत्रक
- गणनेचा कालावधी (घर-घर पडताळणी)
11 डिसेंबर 2025 (गुरुवार) पर्यंत
- मतदान केंद्रांची पुनर्रचना/पुनर्व्यवस्था
11 डिसेंबर 2025 (गुरुवार) पर्यंत
- नियंत्रण तक्ता अद्ययावतीकरण व मसुदा यादी
12 डिसेंबर ते 15 डिसेंबर 2025 पर्यंत
- मसुदा मतदार यादीचे प्रकाशन
16 डिसेंबर 2025 (मंगळवार)
- दावे आणि हरकती दाखल करण्याची मुदत
16 डिसेंबर ते 15 जानेवारी 2026 पर्यंत
- सूचना जारी करणे, सुनावणी, पडताळणी, निर्णय
16 डिसेंबर 2025 ते 7 फेब्रुवारी 2026 (शनिवार).
Comments are closed.